ໝໍນ້ອຍໃສ່ປົ່ນປາ
ໝໍນ້ອຍປົ່ນປາ ເຮັດຈາກພືດຜັກສວນຄົວພື້ນບ້ານ ຊີວະນາໆພັນກະສິກຳລາວ
ເຮືອນຄົວລາວ
phakhaolao. la
ສ່ວນປະສົມ
- ໃບໝໍນ້ອຍ 1 ຊາມ ຫຼື ປະມານ 10-20ໃບໃຫ່ຍ
- ໃບຍານາງ 5 ໃບ
- ໝາກເຂືອບ້ານ 3 ໜ່ວຍ
- ໝາກເຜັດແຫ້ງ 5 ໜ່ວຍ (ສາມາດເພີ່ມປະລິມານໄດ້ຕາມຕ້ອງການ)
- ຫົວຜັກບົ່ວແຫ້ງ 2 ຫົວ
- ຫອມບົ່ວ 3 ຕົ້ນ
- ຫອມປ້ອມ 5 ຕົ້ນ
- ປາດຸກ 2 ໂຕ (1/2 ກິໄລກຣາມ)
- ປາແດກ 2 ບ່ວງແກງ ຫຼື ເກືອ 1 ບ່ວງຊາ
- ນ້ຳ 1 ລິດ
ຂັ້ນຕອນກະກຽມສ່ວນປະສົມ
- ຄ້າງໝໍ້ແກງໃສ່ນ້ຳ 2-3 ຖວ້ຍແກງ, ຕົ້ມນ້ຳປະໄວ້
- ນຳປາມາຄົວ ແລະ ລ້າງດ້ວຍນ້ຳທີ່ສະອາດ
- ລ້າງຜັກ ແລະ ສ່ວນປະສົມທຸກຢ່າງດ້ວຍນ້ຳສະອາດ
- ລໍຖ້ານ້ຳຝົດແລ້ວໃສ່ປາແດກລົງໝໍ້ ພ້ອມດ້ວຍປາ, ໝາກເຂືອ ແລະ ໝາກເຜັດ
- ນຳຫົວຜັກບົ່ວໄປຈີ່ໃຫ້ສຸກຂະນະທີ່ລໍຖ້າປາສຸກ
- ຫຼັງຈາກຕົ້ມປາໄດ້ 10-15 ນາທີ ໃຫ້ຕັກປາ ພ້ອມດ້ວຍໝາກເຂືອ ແລະ ໝາກເຜັດອອກ ປະໄວ້ໃຫ້ເຢັນ
ວິທີເຮັດປົ່ນປາ
- ນຳໝາກເຜັດ ໃສ່ໃນຄົກ ຕຳໃຫ້ລະອຽດແລ້ວໃສ່ໝາກເຂືອ ຕຳອີກເທື່ອໜຶ່ງ
- ໃສ່ປາລົງໃນຄົກ (ເອົາແຕ່ຊີ້ນເທົ່່່ານ້ັ້ນ ນຳກ້າງ ແລະ ຕັດຫົວປາອອກ), ຕຳໃຫ້ເຂົ້າກັນ
- ເທນ້ຳຕົ້ມປາໃສ່ຄົກ ແລ້ວຄົນໃຫ້ເຂົ້າກັນ ຊິມ ແລະ ເພີ່ມລົດຊາດຕາມຕ້ອງການ
- ແບ່ງປົ່ນປາສ່ວນໜຶ່ງໄວ້ໃສ່ໝໍນ້ອຍ
ວິທີເຮັດໝໍນ້ອຍ
- ນຳໃບໝໍນ້ອຍ ແລະ ໃບຍານາງມາຍ່ອງ ຫຼື ປັ່ນ ໃສ່ນ້ຳ 2-3 ຈອກແກ້ວ
- ນຳປົ່ນປາທີ່ແບ່ງໄວ້ມາປະສົມກັບນ້ຳໃບໝໍນ້ອຍ ແລະ ຍານາງ
- ປະໄວ້ 2-3 ນາທີ ຈຶ່ງຮັບປະທານ (ສາມາດປະໄວ້ຫຼາຍກວ່າ 2 ນາທີ ຖ້າຕ້ອງການໃຫ້ນ້ຳໝໍນ້ອຍເປັນຕ່ອນເຂັ້ມຂຸ້ນ)
ຄຳແນະນຳ
- ຮັບປະທານກັບຜັກລວກ ແລະ ເຂົ້າໜຽວໜຶ້ງຮ້ອນໆຈະແຊບຫຼາຍ
- ປະລິມານສ່ວນປະສົມ ສາມາດປັບປ່ຽນໄດ້ຕາມລົດຊາດທີ່ທ່ານມັກ