ລ້ຽງແມງກິນແມງ ແທນການໃຊ້ສານເຄມີກຳຈັດສັດຕູພືດ (ແມງແຄງພິຄາດ)
ໃນຊຸມປີຜ່ານໆມານີ້ ສປປ ລາວ ໄດ້ປະເຊີນກັບໄພຄຸກຄາມຈາກສັດຕູພືດທຳລາຍຜົນລະປູກ ແລະ ພືດຜົນທຳມະຊາດຢ່າງໜັກໜ່ວງ ອັນສ້າງຄວາມເສຍຫາຍໃນລະບົບກະສິກຳໃນວົງກ້ວາງ ແລະ ໃນນັ້ນ ມີທັງແມງໄມ້ສັດຕູພືດ ແລະ ພະຍາດພືດເຊັ່ນ: ຕັກແຕນຝູງໄມ້ປ່ອງ,ບົ້ງຝູງສາລີ,ບົ້ງຝູງເຂົ້າ,ພະຍາດໃບເຫລືອງຫ່ຽວຂອງກ້ວຍເປັນຕົ້ນ.
ສະນັ້ນຈື່ງໄດ້ເຮັດການສຶກສາ ທົດລອງຫາວິທີແກ້ໄຂຊ່ວຍຊາວກະສິກອນ ເພື່ອຫລີກລ່ຽງການໃຊ້ສານເຄມີໃນການແກ້ໄຂ ໂດຍການລ້ຽງແມງກິນແມງ ນໍຳໃຊ້ແມງໄມ້ທີ່ເປັນປະໂຫຍດແບບຊີວະວິທະຍາ ແລະ ເພື່ອຄວບຄຸມກຳຈັດບົ້ງຝູງດັ່ງກ່າວ.
ເຄືອຂ່າຍຊາວກະສິກອນລາວໄດ້ນຳພາຊາວບ້ານຫອຍ,ບ້ານຊ້າງ ແລະ ບ້ານນາຕໍ ເມືອງຄູນ.ບ້ານຍອດຮວາຍ,ບ້ານຍອດຄໍ,ບ້ານຊາວ,ບ້ານກໍຫາດ,ບ້ານໜອງແຫຼ້,ບ້ານຍວນ ທີ່ເມືອງແປກ ແຂວງຊຽງຂວາງ.ບ້ານສາມັກຄີໄຊ,ບ້ານ ໂພນສະຫວ່າງ,ບ້ານປາກກໍ,ບ້ານນໍ້າແລງ,ບ້ານຫ້ວຍຈາຍ ເມືອງຫລາ,ບ້ານຫລັກ 10,ບ້ານຫລັກ 5,ບ້ານຫ້ວຍອຸ່ນ ເມືອງໄຊ ແຂວງອຸດົມໄຊ ຝຶກອົບຮົມ ການລ້ຽງແມງແຄງ ຊ່ວງອາຍຸແຕ່ໄວ 1 ຮອດໄວ 5 ເຊິ່ງໄວໃຫ່ຍເຕັມໂຕ ຂອງແມງແຄງເພື່ອຂະຫຍາຍພັນ ແລະ ອະນຸບານໃຫ້ຖືກຕາມຊ່ວງອາຍຸ. ໄດ້ນໍາພາຊາວບ້ານດັ່ງກ່າວເຮັດການຝຶກອົບຮົມຕົວຈິງ ລົງມືເຮັດກ່ອງລ້ຽງດ້ວຍຕົນເອງ ໄດ້ແນະນໍາຊາວບ້ານຈັບເອົາແມງແຄງລົງລ້ຽງໃນກ່ອງຕົວຈິງດ້ວຍແປງ.
ຜົນໄດ້ຮັບ
- ການລ້ຽງແມງແຄງຢູ່ບ້ານຫອຍ,ບ້ານນາຕໍ ແມ່ນບໍ່ໄດ້ຮັບຜົນ ແມງແຄງຕາຍໝົດ.
- ການລ້ຽງແມງແຄງຢູ່ບ້ານຍວນ,ເມືອງແປກ ແມ່ນໄດ້ຮັບຜົນສຳເລັດ ໄດ້ປ່ອຍແມງແຄງ ເພື່ອປ່ອຍ ເພື່ອຕິດຕາມ ແລະ ເກັບໄວ້ຂະຫຍາຍພັນໃນຊຸດຕໍ່ໄປ.
- ການລ້ຽງແມງແຄງຢູ່ເມືອງໜອງແຮດ ມີ ແມ່ນບໍ່ສຳເລັດ ແມງແຄງທີ່ເອົາໄປລ້ຽງຕາຍໝົດ.
- ສ່ວນການລ້ຽງແມງແຄງຢູ່ແຂວງອຸດົມໄຊ ແມ່ນບໍໄດ້ຮັບຜົນ ແມງແຄງຕາຍ.
ປັດໄຈສູ່ຜົນສຳເລັດ:
- ຍ້ອນອະນຸບານການລ້ຽງໄດ້ດີເຊັ່ນ: ຮູ້ວ່າຊ່ວງແມງແຄງຈະປະສົມພັນ ກັບ ຊ່ວງແມງແຄງວາງໄຂ່ ແມງແຄງມັກອາກາດເຢັນ ມີນໍ້າ ແລະ ອາຫານທີ່ພຽງພໍ.
- ຍ້ອນເຮັດຕາມຄໍາແນະນໍາຕອນຝຶກອົບຮົມທຸກຂັ້ນຕອນ ປ່ຽນກ່ອງລ້ຽງ 3 ຄັ້ງ ຕໍ່ອາທິດ.
- ມີບົ້ງ ແລະ ໜອນນົກ ໃຫ້ແມງແຄງກິນພຽງພໍ.
- ມີກ່ອງປ່ຽນຖ່າຍແມງແຄງເວລາອານາໄມ ແລະ ແຍກແມງແຄງແຕ່ລະໄວບໍ່ໃຫ້ຢູ່ນໍາກັນ ເພື່ອຫຼຸດຜ່ອນການຕາຍ ແລະ ການກິນກັນ.
- ອະນຸບານໂຕອ່ອນຊ່ວງໄວ1 ແລະ ໄວ2 ໄດ້ດີ ຊ່ວງນີ້ແມງແຄງບໍ່ທັນກິນອາຫານແຕ່ຕ້ອງການນໍ້າທີ່ພຽງພໍ.
ສິ່ງທ້າທາຍ:
- ພື້ນທີ່ດັ່ງກ່າວເປັນພື້ນທີ່ນໍາໃຊ້ສານເຄມີ ເຊັ່ນ: ຢາຂ້າຫຍ້າ,ຢາຂ້າແມງໄມ້ ມາຍາວນານ ຍາກຕໍ່ການປ່ຽນແປງ ຫລື ປ່ຽນວິທີການກຳຈັດແມງໄມ້ ແລະ ສັດຕູພືດແບບຊີວະວິທະຍາ.
- ເວົ້າລວມແລ້ວການລ້ຽງແມງແຄງເພື່ອຂະຫຍາຍພັນ ຍັງບໍ່ມີຫ້ອງລ້ຽງ ຫລື ສະຖານທີ່ລ້ຽງທີ່ປອດໄພຈາກສັດຕູຂອງແມງແຄງ ກ່ອງບັນຈຸລ້ຽງຕ້ອງສະອາດ ປ່ຽນກ່ອງທັນທີ ທີ່ເຫັນວ່າກ່ອງເປື້ອນ ເພື່ອຫຼຸດການຕາຍຂອງແມງແຄງ.
- ການຈັດຕັ້ງປະຕິບັດຍັງບໍ່ເໝາະສົມ ບາງພື້ນທີ່ ເພາະບໍ່ມີບົ້ງ ແລະ ໜອນນົກ ມາໃຫ້ແມງແຄງກິນ.
- ຂາດການເກັບກຳຂໍ້ມູນໃນການຕິດຕາມເວລາປ່ອຍ.
ຂໍ້ສະເໜີແນະ:
- ຄວນຮັກສາຄວາມສະອາດ,ປ່ຽນກ່ອງລ້ຽງ ແລະ ອາຫານ ເມື່ອເຫັນວ່າກ່ອງເປື້ອນ ເພາະອາດເປັນສາເຫດເຮັດໃຫ້ແມງແຄງພິຄາດຕາຍໄດ້ຈາກເຊື້ອແບກທີເລຍ.
- ໃຫ້ອາຫານເໝາະສົມພຽງພໍ,ບໍ່ລ້ຽງຫລາຍເກີນໄປເພາະແມງແຄງຈະກິນກັນເອງ ໂດຍສະເພາະໂຕອ່ອນ ແລະ ໂຕລອກຄາບໃໝ່ໆຈະອອ່ນແອ ແລະ ຖືກໂຕອື່ນກິນໄດ້ງ່າຍ.
- ໃຫ້ຄວາມຊຸ່ມເໝາະສົມໃນຊ່ວງແມງແຄງວາງໄຂ່ ຖ້າຄວາມຊຸ່ມບໍ່ໄດ້ມັນຈະໄຂ່ຊ້າ ແລະ ວາງໄຂ່ໄດ້ໜ້ອຍ,ດັ່ງນັ້ນຄວນເພີ້ມຄວາມຊຸ່ມໃນກ່ອງລ້ຽງໂດຍການໃສ່ນໍ້າໃນຄຸ ແລ້ວໄປວາງຂ້າງກ່ອງລ້ຽງ ແລະ ກ່ອງວາງໄຂ່.
- ມີໂຮງເຮືອນສຳລັບການລ້ຽງແມງແຄງໂດຍສະເພາະ.
ຂໍ້ມູນ Lao Farmer Net Work