ອາຫານຕ້ານການອັກເສບ ສາເຫດເລີ່ມຕົ້ນຂອງມະເຮັງ
ຮູ້ຫຼືບໍວ່າອາການເບື້ອງຕົ້ນຂອງຜູ້ຕິດເຊື້ອມະເຮັງ ສ່ວນຫຼາຍເກີດຈາກການອັກເສບທີ່ຕໍ່ເນື່ອງຍາວນານ ຈົນເຮັດໃຫ້ເຊວບໍລິເວນນັ້ນກາຍເປັນເຊວມະເຮັງໃນທີ່ສຸດ ແລະ ອາການອັກເສບຍັງເປັນອາການເບື້ອງຕົ້ນຂອງພະຍາດອັນຕະລາຍອື່ນໆອີກຫຼວງຫຼາຍເຊັ່ນ: ພະຍາດຫົວໃຈ, ພະຍາດເບົາຫວານ, ພະຍາດປວດຂໍ້ ລວມໄປເຖິງພະຍາດຊຶມເສົ້າ ແລະ ພະຍາດສະໝອງເຊື່ອມອີກດ້ວຍ
ອາການອັກເສບ ມີສາເຫດທີ່ເກີດຂຶ້ນຫຼວງຫຼາຍ ທັງຈາກບາດແຜທີ່ເກີດຂຶ້ນແລ້ວບໍ່ໄດ້ຮັບການປິ່ນປົວໃຫ້ຫາຍຢ່າງຖືກວິທີ ຫຼື ອາດຈະເປັນການເຮັດວຽກທີ່ຜິດປົກກະຕິຂອງເຊວໃນຮ່າງກາຍເອງ ທີ່ຢູ່ຊື່ໆກໍອັກເສບຂຶ້ນມາ
ນາຍແພດ ແຟຣງອູ ອາຈານດ້ານໂພຊະນາການ ແລະ ວິທະຍາການລະບາດ ພາກວິຊາໂພຊະນາການໃນສາຂາສາທາລະນະສຸກ ຄະນະແພດສາດມະຫາວິທະຍາໄລຮາວາດ ລະບຸວ່າ ລາຍງານວິໄຈຫຼາຍຊິ້ນ ພົບວ່າສ່ວນປະກອບຂອງອາຫານ ແລະ ເຄື່ອງດື່ມຫຼາຍຊະນິດ ອາດສົ່ງຜົນຕໍ່ການຕໍ່ຕ້ານການອັກເສບໃນຮ່າງກາຍໄດ້ ດັ່ງນັ້ນບໍ່ວ່າຈະມີສາເຫດອັນໃດ ເຮົາສາມາດກິນອາຫານເຫຼົ່ານີ້ເພື່ອຊ່ວຍຫຼຸດຄວາມສ່ຽງໃນການເກີດອາການອັກເສບ ທີ່ຈະນຳໄປສູ່ການເກີດເຊວມະເຮັງໃນອະນາຄົດໄດ້ ລວມໄປເຖິງຊ່ວຍບັນເທົາອາການເຈັບປວດທີ່ເກີດຂຶ້ນເຊັ່ນ ເຫືອກອັກເສບ ແຜອັກເສບ ຯລຯ ໄດ້ອີກດ້ວຍ
ອາຫານຕ້ານການອັກເສບ
- ໝາກເລັ່ນ
- ໝາກໄມ້ຕະກູນເບີຣີ່ ເຊັ່ນ: ສະຕໍເບີຣີ່, ເຊີຣີ່ ແລະ ໝາກ້ຽງ
- ໝາກຖົ່ວ
- ນ້ຳມັນໝາກກອກ
- ຜັກໃບຂຽວ ເຊັ່ນ ຜັກປວຍເລ້ງ, ຫອມປ້ອມ ແລະ ອື່ນໆ
- ປາທະເລ ເຊັ່ນ: ແຊລມອນ ແມກເຄີເຣວ, ທູນ່າ ແລະ ຊາຣ໌ດີນ
ຢ່າງໃດກໍຕາມ ເມື່ອມີອາຫານທີ່ຊ່ວຍຕໍ່ຕ້ານການອັກເສບທີ່ເຮົາຄວນກິນເພີ່ມເຕີມແລ້ວ ຍັງມີອາຫານທີ່ເພີ່ມຄວາມສ່ຽງອາການອັກເສບຫຼາຍຂຶ້ນດ້ວຍ ນາຍແພດ ແຟຣງ ອູ ລະບຸເພີ່ມເຕີມວ່າ ອາຫານບາງຊະນິດມີສ່ວນປະສົມ ຫຼື ສ່ວນປະກອບທີ່ສົ່ງຜົນໃຫ້ເກີດການອັກເສບຫຼາຍຂຶ້ນຕາມຈຳນວນ ພະລັງງານຈາກອາຫານເຫຼົ່ານີ້ ທີ່ສູງຕາມໄປດ້ວຍ ແລະ ອາຫານທີ່ມີພະລັງງານສູງ ກໍອາດເປັນສາເຫດຂອງພະຍາດຕຸ້ຍ ທີ່ເປັນອີກໜຶ່ງສາເຫດຂອງການອັກເສບໃນຮ່າງກາຍໄດ້ເຊ່ນກັນ
ອາຫານເພີ່ມຄວາມສ່ຽງອາການອັກເສບ
- ອາຫານຈືນ
- ນ້ຳອັດລົມ
- ແປ້ງຂັດສີ
- ມັນໝູ ເນີຍທຽມ
- ຊີ້ນແດງ ຊີ້ນສັດແປຮູບ
ເຄັດລັບເພື່ອຫຼຸດການອັກເສບ
ນອກຈາກຈະກິນອາຫາທີ່ຊ່ວຍຫຼຸດການອັກເສບ ແລະ ຫຼີກລ່ຽງອາຫານທີ່ເພີ່ມຄວາມສ່ຽງຂອງການອັກເສບແລ້ວ ການກິນອາຫານທີ່ມີປະໂຫຍດຢູ່ເປັນປະຈຳຢູ່ເປັນປະຈຳ ເຊັ່ນ: ກິນອາຫານແບບ ເມດິເຕເຣນຽນທີ່ເນັ້ນຜັກ ໝາກໄມ້ ເນື້ອຂາວຢ່າງປາ ແລະ ໄກ່ ໝາກຖົ່ວ ແລະ ອາຫານໄຂມັນຕ່ຳ ກິນອາຫານຈາກທຳມະຊາດຫຼາຍກວ່າອາຫານແປຮູບ ອອກກຳລັງກາຍຢ່າງສະໝໍ່າສະເໝີ ແລະ ພັກຜ່ອນໃຫ້ພຽງພໍກໍຊ່ວຍຫຼຸດການອັກເສບຂອງຮ່າງກາຍໄດ້ດີເຊັ່ນກັນ ແຕ່ຫາກພົບວ່າມີອາການອັກເສບສ່ວນໃດສ່ວນໜຶ່ງຂອງຮ່າງກາາຍ ຄວນຮີບປິ່ນປົວ ແລະ ປຶກສາແພດ ກ່ອນທີ່ການອັກເສບຈະລາມໃຫ່ຍໂຕຈົນປິ່ນປົວຍາກລຳບາກຍິ່ງຂຶ້ນ
ຂ່າວ:ໜັງສືພິມວຽງຈັນໃໝ່