ເຂົ້າປຸ້ນ ນໍ້າໄກ່
ເຂົ້າປຸ້ນ ກິນງ່າຍສະບາຍເຮັດໄດ້ຫຼາຍນໍ້າ, ນອກຈາກຈະເຮັດນໍ້າໄດ້ແລ້ວຍັງເຮັດນໍ້າໄກ່ໄດ້ອີກ
ເຮືອນຄົວລາວ
phakhaolao.la
ສ່ວນປະກອບ
- ເຂົ້າປຸ້ນ
- ໄກ່ລາດ
- ໝາກພ້າວ
- ໝາກເຜັດແຫ້ງໃຫ່ຍ
- ຫົວຜັກບົ່ວຊອຍ
- ຫົວຜັກທຽມຊອຍ
- ເກືອ
ຜັກກັບ (ເຫຍື້ອເຂົ້າປຸ້ນ)
- ຫອມລາບ
- ບົວລະພາ
- ໝາກເຜັດດິບ
- ກະລໍ່າ
- ໜໍ່ໄມ້ຕົ້ມ
- ໝາກຖົ່ວຝັກຍາວ
ວິທີປຸງແຕ່ງ
- ຄ້າງໝໍ້ຕົ້ມໄກ່ໃຫ້ສຸກປະມານ 45 ນາທີ, ຫຼັງຈາກນັ້ນກໍຕັກຊີ້ນໄກ່ອອກ ປະໄວ້ໃຫ້ເຢັນ ແລ້ວຕົ້ມນໍ້າໃນໝໍ້ຕໍ່ໄປໂດຍໃຊ້ໄຟອ່ອນໆ
- ນຳຊີ້ນໄກ່ມາຊອຍເປັນຕ່ອນນ້ອຍໆ ຫຼື ຂະໜາດຕາມຕ້ອງການ (ສາມາດນຳໄປຕຳໃຫ້ມຸ່ນໄດ້ ເພື່ອເພີ່ມລົດຊາດໃຫ້ນໍ້າໄກ່)
- ແຊ່ໝາກເຜັດແຫ້ງໃຫ່ຍປະໄວ້ ປະມານ 30 ນາທີ, ແລ້ວນຳມາຟັກ ແລະ ຕຳໃຫ້ລະອຽດ
- ຄ້າງໝໍ້ອີກໜຶ່ງໜ່ວຍ ເພື່ອກຽວນໍ້າໜ້າ, ເລີ່ມຈາກເທນໍ້າມັນລົງໃສ່ ຫຼັງຈາກນໍ້າມັນຮ້ອນກໍນຳກະທຽມ ແລະ ຫົວຜັກບົ່ວຊອຍລົງໄປກຽວ, ຕໍ່ດ້ວຍເທກະທິໃສ່ ແລະ ໝາກເຜັດແຫ້ງສັບ. ໃຊ້ເວລາຂົ້ວປະມານ 5-7 ນາທີ ຫຼື ຈົນກວ່າຈະມີກິ່ນຫອມເຊິ່ງເຮົາຈະຄົນຢູ່ຕະຫຼອດເວລາ ເພື່ອບໍໃຫ້ຕິດໝໍ້
- ຫຼັງຈາກທີ່ກຽວນໍ້າໜ້າໄດ້ແລ້ວ ກໍເທໃສ່ໝໍ້ນໍ້າຕົ້ມໄກ່ ຕາມດ້ວຍຕ່ອນໄກ່ທີ່ຊອຍໄວ້, ຕົ້ມປະໄວ້ປະມານ 5 ນາທີ
- ໃສ່ເກືອ ແລະ ປຸງລົດຊາດຕາມໃຈມັກ
- ນຳຜັກກັບທີ່ກຽມໄວ້ໃນສູດມາລ້າງໃຫ້ສະອາດ ກໍສາມາດຮັບປະທານກັບເຂົ້າປຸ້ນນໍ້າໄກ່ໄດ້ແລ້ວ
ແນະນຳ
ຮັບປະທານກັບຜັກກັບທີ່ກຽມໄວ້ໃນສູດ
