ຂ່ານ້ຳ / False Cardamom Ginger

ເກິດເປັນສຸ່ມ, ລຳຕົ້ນສູງເຖິງ 3 ແມັດ. ໃບຮູບຂອບຂະໜານ ຍາວເຖິງ 1 ແມັດ, ກ້ຽງດ້ານເທິງ, ດ້ານລຸ່ມມີຂົນ. ລີ້ນໃບຮູບສາມຫຼ່ຽມ, ປາຍແຫຼມ, ຂົນຫຍາບຊາ. ຊໍ່ດອກເກີດຢູ່ປາຍຍອດ, ຕັ້ງຊື່, ມີດອກຈຳນວນຫຼາຍ. ດອກສີຂາວປົນສີເຫຼືອງ, ມີເສັ້ນສີແດງກະຈາຍ. ດອກຈຸ້ມຮູບຮີ, ສີຂາວ. ໃບປະດັບຮູບໃບຫອກ, ເມື່ອແຫ້ງເປັນສີນ້ຳຕານ, ມີຂົນ. ກາບດອກໂຄນເຊື່ອມຕິດກັນເປັນຫຼອດ, ປາຍແຍກເປັນສາມແສກນ້ອຍໆ, ມີຂົນອ່ອນນຸ້ມ. ກີບດອກໂຄນເຊື່ອມຕິດກັນເປັນຫຼອດ, ປາຍແຍກເປັນສາມແສກ ຮູບຮີ-ຮູບຂອບຂະໜານ ຍາວປະມານ 1 ຊັງຕິແມັດ. ກີບປາກຮູບໄຂ່ກວ້າງ, ປາຍແຍກເປັນສອງແສກ, ຂອບເປັນຄື່ນຫຍໍ້ຍັບ, ເຄີ່ງກາງຈະມີເສັ້ນສີແດງກະຈາຍ, ໃກ້ຂອບຈະເປັນສີເຫຼືອງ, ກີບຄູ່ຂ້າງເປັນຕີ່ງຮູບແຖບ, ປາຍແຫຼມ, ສີແດງ. ເຕົ່າໄຂ່ມົນກົມ, ມີຂົນກະຈາຍ. ໝາກມີຂົນ, ເມື່ອສຸກເປັນສີແດງ ຫຼື ສີສົ້ມ. ເມັດຮູບໄຂ່, ເມື່ອແກ່ເປັນສີດຳ.

ນິເວດວິທະຍາ: ເປັນພືດມັກເກີດບ່ອນທີ່ເປັນດີນຊາຍ, ພົບຕາມປ່າປະສົມປ່ຽນໃບ, ແຄມແມ່ນ້ຳ ໂດຍສະເພາະແມ່ນນ້ຳຂອງ, ແຄມນ້ຳງື່ມ. ຢູ່ແຕ່ລະດັບ 200-500 ແມັດ