ໃບໜາດ / Ngai Camphor Tree

ຕົ້ນໜາດຈັດເປັນໄມ້ຟຸ່ມ, ໄມ້ລົ້ມລຸກທີ່ມີອາຍຸໄດ້ຫຼາຍປີລຳຕົ້ນມີຄວາມສູງປະມານ 0.5–4 ແມັດ, ລຳຕົ້ນຕັ້ງຊື່, ເນື້ອໄມ້ເປັນແກນແຂງ, ເປືອກຕົ້ນລຽບເປັນສີຂຽວອົມຂາວ. ເມື່ອແກ່ຈະເປັນສີນ້ຳຕານແກມເທົາແຕກກີ່ງກ້ານຫຼາຍ, ມີຂົນສີຂາວ ຫຼື ສີເຫຼືອງອ່ອນຂຶ້ນປົກຄຸມ ແລະ ມີກິ່ນຫອມ. ໃບ: ເປັນໃບດ່ຽວອອກຫຼຽງສະຫຼັບ, ລັກສະນະຂອງໃບເປັນຮູບຍາວຮີ, ຮູບຂອບຂະໜານແກມໃບຫອກ ຫຼື ຮູບຂອບຂະໜານແກມຮູບໄຂ່, ປາຍໃບແຫຼມ ຫຼື ມີຕິ່ງໜາມ. ໂຄນໃບຮຽວແຫຼມເລັກນ້ອຍ. ສ່ວນຂອບໃບເປັນຢັກບໍ່ເທົ່າກັນມີຂະໜາດກວ້າງປະມານ 1.2–4.5 ຊັງຕີແມັດ ແລະ ຍາວປະມານ 10–17 ຊັງຕີແມັດ. ແຜ່ນໃບເປັນສີຂຽວ, ຫຼັງໃບ ແລະ ທ້ອງໃບມີຂົນທັງສອງດ້ານ, ກ້ານໃບສັ້ນ ຫຼື ບໍ່ມີ. ດອກ: ເປັນດອກກະຈຸກແນ່ນ ອອກເປັນຊໍ່ແບບແຍກຂະແໜງໃຫຍ່ຢູ່ບໍລິເວນປາຍກີ່ງ ຫຼື ຊອກໃບ. ຊໍ່ດອກມີຂະໜາດໃຫຍ່ບໍ່ເທົ່າກັນ ໂດຍມີຂະໜາດກວ້າງປະມານ 6–30 ຊັງຕີແມັດ ແລະ ຍາວປະມານ 10–50 ຊັງຕີແມັດ, ຊັ້ນໃບປະດັບຍາວກວ່າດອກຍ່ອຍ, ລັກສະນະຂອງດອກຍ່ອຍມີຂະໜາດນ້ອຍສີເຫຼືອງ, ລັກສະນະເປັນຮູບຊົງກະບອກ ມີກີບດອກຕິດກັນເປັນຫຼອດຍາວເຖີງ 6 ມີນລີແມັດ, ປາຍກີບເມື່ອບານຈະແຍກເປັນແຍກກັນເປັນ 5 ກີບ, ກີບດອກອ່ອນເປັນສີເຫຼືອງເມື່ອແກ່ແລ້ວກີບດອກຈະປ່ຽນເປັນສີຂາວ, ໂຄນດອກມີກີບລ້ຽງລັກສະນະເປັນເສັ້ນຝອຍປາຍແຫຼມຫຸ້ມຢູ່. ດອກມີເກສອນຜູ້ 5 ອັນ ຍື່ນອອກມາຈາກໃຈກາງດອກ ແລະ ດອກມີຂະໜາດເສັ້ນຜ່າສູນກາງປະມານ 1 ຊັງຕີແມັດ. ໝາກ: ເປັນໝາກແຫ້ງບໍ່ແຕກເປັນຮູບຂອບຂະໜານ ຍາວປະມານ 1 ມີນລີແມັດ, ສີນ້ຳຕານໂຄ້ງງໍເລັກນ້ອຍ, ມີລັກສະນະເປັນເສັ້ນນ້ອຍໆ 5–10 ເສັ້ນ. ດ້ານເທີງເປັນສີຂາວໆປົກຄຸມ.