Return to Knowledge Base

ຫອຍປາກກວ້າງ / Golden Apple Snail

Cite
ຊະນິດຮ່ວມ
ການນຳໃຊ້
ອາຫານ
ສີນຄ້າ
ຊື່ວິທະຍາສາດ / ຕະກຸນ
Pomacea canaliculata (Lamarck, 1819) / Ampullariidae
ຊື່ພ້ອງ
ຊື່ອື່ນ
ໄທ: ຫອຍເຊີຣີ
ອັງກິດ: Golden apple snail
ສະຖານະພາບການອະນຸລັກ
Least Concern
ພັນລະນາລັກສະນະສັນຖານ

ຫອຍປາກກວ້າງເປັນຫອຍທາກນ້ຳຈືດຊະນິດໜຶ່ງ ມີລັກສະນະຄ້າຍຫອຍໂຂງ, ເປືອກມີສີອ່ອນກວ່າ ຄື: ສີຂຽວເຂັ້ມປົນດຳປະສົມແຖບສີຈາງ ພາດຕາມຄວາມຍາວຂອງເປືອກ, ບາງຕົວມີສີຂຽວເຂັ້ມປົນດຳ ແລະ ບາງຕົວມີສີເຫຼືອງປົນ. ສ່ວນຫົວຢູ່ປາຍສຸດທາງດ້ານໜ້າຂອງລຳໂຕ ປະກອບດ້ວຍປາກຢູ່ບໍລິເວນເຄິ່ງກາງຂ້ອນໄປທາງດ້ານທ້ອງ, ມີຮິມຝີປາກທີ່ມີລັກສະນະເປັນແຜ່ນຢື່ນອອກມາທາງດ້ານຂ້າງ 2 ຂ້າງ, ພາຍໃນປາກມີຄາງກະໄຕຂະໜາດໃຫຍ່ 1 ຄູ່ ໃຊ້ກັດກິນອາຫານ. ຖັດເຂົ້າໄປມີ radula ມີລັກສະນະເປັນເສັ້ນບາງໆທີ່ເຕັມໄປດ້ວຍແຂ້ວຂະໜາດນ້ອຍແຫຼມຄົມສີແດງຈຳນວນຫຼາຍພັນເຫຼັ້ມຮຽງເປັນແຖວຂວາງ 5 ແຖວ ເຮັດໜ້າທີ່ໃນການບົດອາຫານ, ຫອຍປາກກວ້າງຫົວຂະໜາດສັ້ນປະກອບດ້ວຍໜວດ 2 ຄູ່, ຄູ່ທີ່ 2 ຢູ່ຕິດກັບຕາ ແລະ ຍາວກວ່າຄູ່ທຳອິດ, ໜວດມີຮູບຮ່າງນ້ອຍ, ປາຍຮຽວແຫຼມ ເຮັດໜ້າທີ່ໃນການຮັບຄວາມຮູ້ສຶກ, ໜວດສາມາດຫົດສັ້ນ ແລະ ແປລົງໄດ້. ຕີນມີລັກສະນະເປັນກ້າມຊີ້ນໜ້າເປັນຮູບ 3 ຫຼ່ຽມ, ປາຍແຫຼມຊີ້ໄປທາງຫຼັງ, ຜິວຍາບສາມາດຍືດຍາວ ແລະ ແປໄດ້, ເຮັດໜ້າທີ່ໃນການຄືບຄານເພື່ອເຄື່ອນທີ່, ມີຊ່ອງເປີດຂອງຕ່ອມເຫງືອກ ທີ່ເຮັດໜ້າທີ່ຜະລິດເມືອກເພື່ອຊ່ວຍໃນການເຄື່ອນທີ່, ສ່ວນທ້າຍຂອງລຳໂຕຍັງປະກອບໄປດ້ວຍທາງເດີນອາຫານ, ລະບົບສືບພັນ ແລະ ລະບົບປະສາດ

      ອາຫານ: ຫອຍປາກກວ້າງສາມາດກິນພືດນ້ຳໄດ້ເກືອບທຸກຊະນິດທີ່ມີລັກສະນະໃບອ່ອນ, ສາມາດກິນອາຫານໄດ້ໄວສະເລ່ຍວັນລະ 50% ຂອງນ້ຳໜັກໂຕ ແລະ ສາມາດກິນໄດ້ຕະລອດເວລາ, ໃນເວລາກາງວັນແດດກ້າຈະຫຼົບລີ້ຢູ່ຮົ່ມຂອງພືດນ້ຳ. ວິທີການກິນອາຫານຂອງພວກມັນແມ່ນຈະໃຊ້ຄາງກະໄຕກັດ ແລະ ສົ່ງເຂົ້າຊ່ອງປາກ, ກ້າມຊີ້ນໃນປາກຈະສົ່ງໄປສ່ວນ radular ເຮັດໜ້າທີ່ໃນການບົດໃຫ້ລະອຽດ

ບັນຍາຍການນຳໃຊ້

ອາຫານ: 

  • ຊີ້ນ: ສາມາດຮັບປະທານເປັນອາຫານໄດ້ ແລະ ເປັນທີ່ນິຍົມຢ່າງກວ່້າງຂວາງ, ສາມາດນຳມາປະກອບອາຫານໄດ້ຫຼາຍຢ່າງ ຫຼື ນຳມາເຮັດນ້ຳປາຈາກຫອຍປາກກວ້າງໄດ້
  • ມີໂປຣຕີນສູງ 34-53%, ໄຂມັນ 1.66%.
  • ສູນວິໄຈຈາຫແຄນາດາລະບຸວ່າຫອຍປາກກວ້າງອຸດົມໄປດ້ວຍສານອາຫານ ຄືເປັນແຫຼ່ງຂອງວິຕາມິນເອ, ວິຈາມິນບີ 1 (ໄທອາມີນ), ບີ2 (ໄລໂບຟຼາມວິນ), ບີສາມ (ໄນອາຊິນ), ວິຕາມິນຊີ ແລະ ວິຕາມິນດີ
  • ການຮັບປະທານຫອຍປາກກວ້າງເຮົາຈະໄດ້ຮັບທາດເຫຼັກ, ທອງແດງ, ໄອໂອດີນ, ມັກນີຊຽມ, ແຄລຊຽມ, ສັງກະສີ, ແມງການີສ ແລະ ຟອສຟໍຣັດ

ປະໂຫຍດ: 

  • ໃຊ້ເປັນອາຫານສັດໄດ້ ເຊັ່ນ: ລ້ຽງເປັດ, ໄກ່  ແລະ ໝູ
  • ເປືອກສາມາດນຳມາປັບສະພາບຄວາມເປັນກົດຂອງດິນໄດ້
  • ເປືອກເມື່ອນຳໄປຖິ້ມໄວ້ໃຕ້ຕົ້ນໄມ້ ເມື່ອເນົ່າເປືອຍກໍ່ຈະກາຍເປັນປຸຍໃຫ້ກັບຕົ້ນໄມ້ 

 ຜົນເສຍຈາກຫອຍປາກກ້ວາງ: 

  • ທຳລາຍນາເຂົ້າຂອງຊາວນາເຮັດໃຫ້ເກີດຄວາມເສຍຫາຍເປັນຈຳນວນຫຼາຍ ແລະ ໄວ.
  • ບໍ່ຄວນກິນຫອຍປາກກວ້າງດິບ ເພາະອາດຈະມີແບັກທິເຣຍ, ຜູ້ປ່ວຍທີ່ເປັນພະຍາດຕັບ, ມະເຣັງ ແລະ ພະຍາດພູມແພ້ຄວນຫຼີກລ້ຽງ
ການສຶບພັນ ແລະ ວົງຈອນຊີວິດ

        ການປະສົມພັນ: ຫອຍປາກກວ້າງເປັນຫອຍທີ່ແຍກເພດ, ຫອຍທີ່ພ້ອມຈະຂະຫຍາຍພັນໄດ້ອາຍຸປະມານ 3 ເດືອນ. ການປະສົມພັນເພດຜູ້ຈະມີອະໄວຍະວະສືບພັນດຽວ ມີອັນທະເປັນທໍ່ຢື່ນອອກມາ ເພື່ອໃຊ້ສອດສະເປີມເຂົ້າໄປປະສົມພັນກັບໄຂ່ ກ່ອນທີ່ໄຂ່ຈະສ້າງເປືອກ, ຫຼັງຈາກໄຂ່ໄດ້ຮັບການປະສົມພັນ 1-2 ວັນ ຫອຍເພດເມຍຈະວາງໄຂ່ ໂດຍສ່ວນຫຼາຍຈະວາງໄຂ່ໃນຍາມກາງຄືນ ໂດຍຈະຄານຂຶ້ນໄປວາງຢູ່ບ່ອນທີ່ແຫ້ງເທິງຜິວນ້ຳ, ເວລາໃນການວາງໄຂ່ແມ່ນ 1-6 ຊົ່ວ, ໄຂ່ທີ່ອອກມາໃໝ່ຈະອ່ອນນຸ້ມ ແລະ ມີເມືອກຕິດທຸກໜ່ວຍ, ແຕ່ລະຄັ້ງປະກອບດ້ວຍໄຂ່ຈຳນວນ 388-3,000 ໜ່່ວຍ, ໄຂ່ຈະມີສີບົວ ແລະ ຈາງລົງເກືອບເປັນສີຂາວ, ພາຍໃນ 7-14 ວັນ ເປືອກໄຂ່ຈະແຕກອອກ ຫຼັງອອກຈາກໄຂ່ປະມານ 2 ວັນເປືອກຈະແຂງ, ສາມາດກິນອາຫານໄດ້ທັນທີ, ສະລັບແມ່ຫອຍເມື່ອວາງໄຂ່ແລ້ວ 4-10 ວັນກໍ່ສາມາດວາງໄຂ່ໄດ້ອີກ ແລະ ສາມາດວາງໄຂ່ໄດ້ຕະຫຼອດປີ ແລະ ສາມາດວາງໄຂ່ໄດ້ຈົນຮອດອາຍຸ 2-3 ປີ.

ເອກະສານອ້າງອີງ / ການອ້າງອີງ
Mohd Salleh, N.H., Arbain, D., Mohamed Daud, M.Z., Pilus, N., Nawi, R. (2012). Distribution and Management of Pomacea canaliculata in the Northern Region of Malaysia: Mini Review. APCBEE Procedia 2: 129–134.
Meeseangkaew, P., Seehabutr, V., Tumkeratiwong, P. (2007). Early Embryonic Development of Golden Apple Snail Pomacea canaliculata (Lamarck, 1822). Department of Zoology, Faculty of Science, Kasetsart University.
Liu, C., Zhang, Y., Ren, Y., Wang, H., Li, S., Jiang, F., Yin, L., Qiao, X., Zhang, G., Qian, W., Liu, B., Fan, W. (2018). The genome of the golden apple snail Pomacea canaliculata provides insight into stress tolerance and invasive adaptation. Genome of the golden apple snail, 7: 1–13.
Marwoto, R.M., Heryanto, H., Joshi, R.C. (2020). The invasive apple snail Pomacea canaliculata in Indonesia: a case study in Lake Rawa Pening, Central Java. BIO Web Conf. 19.
ຜູ້ຮ່ວມມືໃນການສ້າງ
Duangkhae KEONOY
ການປະກອບສ່ວນ