ນົກເຈົ່ານາ / Chinese Pond Heron

       ນອກລະດູປະສົມພັນໂຕຜູ້ ແລະ ໂຕແມ່ມີລັກສະນະຄືກັນ ຫຼັງມີສີນ້ຳຕານເຂັ້ມ, ຫົວ, ຄໍມີສີນ້ຳຕານເຂັ້ມ ແລະ ມີລາຍສີນ້ຳຕານແກມເຫຼືອງປົນສີຂຽວ. ປາກເປັນສີເຫຼືອງ, ປາຍສີດຳ. ລຳໂຕດ້ານເທິງເປັນສີນ້ຳຕານປົນເທົາເຂັ້ມ, ລຳໂຕດ້ານລຸ່ມເປັນສີຂາວ, ແຂງ ແລະ ຕີນເປັນສີເຫຼືອງປົນສີຂຽວ, ຂະນະບິນປີກ ແລະ ຫາງເປັນສີຂາວ, ບາງໂຕເປັນສີເຂັ້ມກວ່າເລັກນ້ອຍ. ໃນລະດູປະສົມພັນຫຼັງຈະເປັນສີນ້ຳເງິນປົນສີຂຽວປົນດຳ, ຫົວ, ຄໍ ແລະ ເອິກປ່ຽນເປັນສີນ້ຳຕານປົນແດງ. ປາກມີສີເຫຼືອງສົດ, ປາຍດຳ, ໜັງຮອບຕາມີສີຂຽວແກມສີເຫຼືອງ. ແຂງ ແລະ ຕີນເປັນສີແດງ.

       ສຽງຮ້ອງ: ເອີ້ນ ກຣອກໆ

       ຖິ່ນອາໄສ: ເປັນນົກປະຈຳຖິ່ນມັກພົບເຫັນໃນຊ່ວງລະດູໜາວ ຕາມທົ່ງນາ, ໜອງນ້ຳ, ແຄມປ່າ ແລະ ປ່າຊຸ່ມນ້ຳ.

       ອາຫານ: ອາຫານຂອງພວກມັນໄດ້ແກ່ສັດນ້ຳຂະໜາດນ້ອຍ ເຊັ່ນ ກຸ້ງ, ລູກປູ, ລູກປາ, ລູກງູ ແລະ ແມງໄມ້ຕ່າງໆ

       ພຶດຕິກຳ: ສ່ວນໃຫຍ່ຈະຢູ່ເປັນຝູງ ມັກເກາະຢູ່ຕາມກິ່ງໄມ້ແຫ້ງ ຫຼື ກໍໄຜ່, ມັກຫາກິນຕາມທີ່ໂລ່ງ, ມັກຢືນຢູ່ຊື່ໆ ແນມເບິ່ງຫາປາ ແລະ ເວລາພັກຜ່ອນຈະຫົດຄໍສັ້ນລົງ, ເວລາບິນຈະສົ່ງສຽງຮ້ອງດັງ.

       ໄວຈະເລີນພັນ: ເລີ່ມປະສົມພັນໃນຊ່ວງເດືອນເມສາ ຫາ ເດືອນສິງຫາ, ສ້າງຮັງຕາມຕົ້ນໄມ້