ຜັກຫວານຂີ້ໄກ່

ຈັດເປັນໄມ້ຟຸ່ມ ຫຼື ໄມ້ຢືນຕົ້ນຂະໜາດນ້ອຍ. ລຳຕົ້ນສູງປະມານ 4 ມ, ບໍລິເວນກິ່ງອອ່ນ ແລະ ຕາຍອດມີຂົນປົກຄຸມ. ໃບດ່ຽວ, ອອກຮຽງສະຫຼັບ, ຮູບຮີ, ຮູບຮີແກມຮູບຂອບຂະໜານ ຫຼື ຮູບໄຂ່, ກວ້າງ 1-5 ຊມ, ຍາວ 3-15 ຊມ, ໂຄນໃບຮູບຫຼິ່ມ, ຂອບເປັນແສກແຂ້ວເລື່ອຍ, ປາຍແຫຼມ, ແຜ່ນໃບບາງຄ້າຍເຈ້ຍ, ມີຂົນສີເຫຼືອງທັງສອງດ້ານ. ຫູໃບຮູບຫອກແກມຮູບແຖບ, ຂະໜາດ 1.5-3 ມມ, ລັກສະນະບາງຄ້າຍກະດາດ, ມີຂົນອ່ອນນຸ້ມກະຈາຍຫ່າງໆ. ກ້ານໃບຍາວ 3-10 ມມ, ມີຂົນອ່ອນນຸ້ມປົກຄຸມ. ຊໍ່ດອກແບບກະຈະ, ອອກຕາມງ່າມໃບ. ດອກຍ່ອຍມີ 2-3 ດອກ, ສີຂາວແກມຂຽວ. ກ້ານດອກຍາວປະມານ 1 ມມ. ປະດັບຮູບໄຂ່, ຂະໜາດປະມານ 2 ມມ. ກາບດອກມີ 4-5 ກີບ, ຮູບຂອບຂະໜານແກມຮູບໄຂ່ປີ້ນ, ຂະໜາດ 3-4 ມມ, ມີຂົນຂຸຍ. ເກສອນເພດຜູ້ມີ 8 ອັນ, ກ້ານຊູຍາວ 1 ມມ, ຖົງລະອອງຮູບໄຂ່ ຫຼື ຮູບຂອບຂະໜານ, ຂະໜາດ 0.5-0.7 ມມ. ເຕົ້າໄຂ່ຮູບໄຂ່, ຂະໜາດປະມານ 1 ມມ, ປາຍຮວງຮັບຍາວ 0.5-1 ມມ, ປາຍແຍກອອກເປັນ 3 ແສກ. ໝາກຮູບຮີ, ຂະໜາດກວ້າງປະມານ 1 ຊມ, ຍາວປະມານ 1.5 ຊມ, ມີ 3-4 ພູ, ໝາກແກ່ແລ້ວແຕກເປັນ 3 ແສກ, ໝາກອ່ອນສີຂຽວ, ໝາກແກ່ເປັນສີເຫຼືອງ. ກ້ານໝາກຍາວປະມານ 5 ມມ. ແກ່ນມີ 3-8 ແກ່ນ, ຮູບໄຂ່, ສີຂາວ, ມີເນື້ອຫຸ້ມແກ່ນສີແດງ.