ດູ່ທົ່ງ / Clitoria

ລຳຕົ້ນເປັນລຳເລືອຂະໜາດນ້ອຍ, ເລືອໄປຕາມໜ້າດິນ, ຮູບກົມ, ມີຂໍ້ສັ້ນ, ຍາວ 15-25 ຊມ, ມີຂົນກະຈາຍຫ່າງໆ. ມີຮາກທີ່ຂະຫຍາຍໄປເປັນຮາກເກັບສະສົມອາຫານ, ອວບນ້ຳ. ໃບປະສົມຂັ້ນໜຶ່ງແບບຂົນນົກປາຍຄີ, ອອກຮຽງສະຫຼັບຕາມຂໍ້. ໃບຍ່ອຍມີ 3 ໃບ,​ ອອກຮຽງສະຫຼັບ, ຮູບຫອກ, ຮູບຂອບຂະໜານ ຫຼື ຮູບໄຂ່, ໂຄນໃບແຫຼມ ຫຼື ຮຽວແຫຼມ, ຂອບມີວັກ ແລະ ມີຂົນຂຸຍກະຈາຍຢູ່ທົ່ວ, ປາຍແຫຼມ​ ຫຼື ມີຕິ່ງໜາມ, ໃບກາງກວ້າງ 3.4-5.7 ຊມ, ຍາວ 9-12.9 ຊມ, ໃບດ້ານຂ້າງກວ້າງປະມານ 3-3.6 ຊມ, ຍາວ 6.4-9 ຊມ, ແຜ່ນໃບໜາ, ໜຽວ ແລະ ຫຍາບ, ຜິວໃບດ້ານເທິງເປັນສີຂຽວເຂັ້ມ, ຜິວໃບດ້ານລຸ່ມເປັນສີເທົາ. ຫູໃບຮຽວແຫຼມ, ສີຂຽວອ່ອນ. ຊໍ່ດອກແບບກະຈະ, ອອກຕາມງ່າມໃບ, ຍາວ 4-5.5 ຊມ. ດອກຍ່ອຍຄ້າຍດອກອັນຊັນ, ສີຂາວ. ກີບດອກຮູບຖົ່ວ, ກີບດອກກີບນອກສຸດຮູບໄຂ່, ກວ້າງປະມານ 1.8 ຊມ, ຍາວປະມານ 3.5 ຊມ. ໝາກເປັນຝັກກົມ, ກວ້າງ 0.6-0.7 ຊມ, ຍາວ 4.3-4.9 ຊມ, ໝາແຫ້ງແລ້ວແຕກ, ສີນ້ຳຕານ. ແກ່ນມີ 6-8 ແກ່ນ, ຮູບຖົ່ວ.