ເຂົ້າສານໃຫຍ່

ລຳຕົ້ນເປັນເປັນລຳເຄືອ, ກ້ຽວພັນຕາມຕົ້ນໄມ້ອື່ນ, ມີຂໍ້, ຂະໜາດນ້ອຍ, ຜິວກ້ຽງ, ທຸກພາກສ່ວນຂອງລຳຕົ້ນມີຢາງສີຂາວ. ໃບດ່ຽວ, ອອກຮຽງກົງກັນຂ້າມກັນ, ຮູບໄຂ່ ຫຼື ຮູບຫົວໃຈ, ກວ້າງ 4-5 ຊມ, ຍາວ 6-20 ຊມ, ໂຄນໃບຮູບຫົວໃຈ, ຂອບລຽບ, ປາຍແຫຼມ ຫຼື ຍາວເປັນຫາງ, ແຜ່ນໃບບາງຄ້າຍຄືເຈ້ຍ, ຜິວໃບດ້ານເທິງມີຂົນອອກເປັນກະຈຸບໍລິເວນໂຄນເສັ້ນກາງໃບ. ກ້ານໃບຮຽວນ້ອຍ, ຍາວ 4-12 ຊມ. ຊໍ່ດອກແບບດິ້ວຄັນຮົ່ມ, ອອກຕາມງ່າມໃບ. ກ້ານຊໍ່ດອກຍາວປະມານ 5-10 ຊມ. ດອກຍ່ອຍມີ 4-10 ດອກ, ດອກຍານເຕັມທີມີຂະໜາດ 3-4 ຊມ, ສີຂາວ ຫຼື ສີຄີມ, ມີກິ່ນຫອມ. ກ້ານດອກຍ່ອຍມີຂະໜາດນ້ອຍ ແລະ ຍາວ 2-5 ຊມ. ກາບດອກເຊື່ອມຕິດກັນເປັນຫຼອດ, ຍາວ 3-4 ມມ, ປາຍແຍກອອກເປັນ 5 ກາບ, ຮູບໄຂ່ ຫຼື ຮູບຂອບຂະໜານ, ຂອບບາງ. ກີບດອກເຊື່ອມຕິດກັນເປັນຮູບລະຄັງ, ຍາວ 12-18 ມມ, ປາຍແຍກອອກເປັນ 5 ແສກ, ສີຂາວ. ເກສອນເພດຜູ້ໂຄນເຊື່ອມຕິດກັນເປັນເສົາ, ປາຍແຍກອອກ 5 ອັນ, ຍາວ 10-12​ ມມ. ໝາກກຸ່ມ, ເປັນຝັກຄູ່, ມີລັກສະນະໂຄ້ງເລັກນ້ອຍ, ຍາວປະມານ 15 ຊມ. ແກ່ນຈຳນວນຫຼາຍ, ຮູບໄຂ່, ມີຂົນຟູ, ຍາວປະມານ 4 ຊມ, ຂົນສີຂາວ.