ຕົ້ນຊົມຊື່ນ / Ash Sheora
APA 6th ed. ຕົ້ນຊົມຊື່ນ / Ash Sheora. (2020, March 12). Retrieved from https://www.phakhaolao.la/kb/0000829
MLA 8th ed. ຕົ້ນຊົມຊື່ນ / Ash Sheora. Pha Khao Lao, 12 March 2020, https://www.phakhaolao.la/kb/0000829.
Chicago 17th ed. Pha Khao Lao. 2020. "ຕົ້ນຊົມຊື່ນ / Ash Sheora." Published March 12, 2020. https://www.phakhaolao.la/kb/0000829.
Chionotria monogyna Walp.
Chionotria rigida Jack
Glycosmis arborea (Roxb.) DC.
Glycosmis arborea var. linearifoliolata V.Naray.
Glycosmis chylocarpa Wight & Arn.
Glycosmis madagascariensis Corrêa ex Risso
Glycosmis pentaphylla var. linearifoliolis Tanaka
Glycosmis quinquefolia Griff.
Glycosmis retzii M.Roem.
Glycosmis rigida (Jack) Merr.
Limonia arborea Roxb. Limonia pentaphylla Retz.
Myxospermum chylocarpum (Wight & Arn.) M. Roem.
Eng: Ash Sheora
ເປັນພັນໄມ່ຟຸ່ມ, ມີຂະໜາດນ້ອຍ, ສູງ 2-4 ແມັດ, ແຕກກິ່ງກ້ານຕໍ່າຕັ້ງແຕ່ກົກຕົ້ນເປັນຟຸ່ມເຕ້ຍ, ລໍາຕົ້ນເປັນຫຼ່ຽມ, ເປືອກຕົ້ນລຽບເປັນສີນໍ້າຕານອົມເທົາ, ຜິວຕາມລໍາຕົ້ນຕົກກະເປັນວົງສີຂາວ, ຂະຫຍາຍພັນໂດຍໃຊ້ແກ່ນ, ຕອນກິ່ງ ແລະ ປັກຊໍາ. ໃບເປັນໃບປະສົມແບບຂົນນົກ, ອອກລຽງສະລັບກົງກັນຂ້າມກັນ, ມີໃບຍ່ອຍ 3-5 ໃບ, ລັກສະນະຂອງໃບຍ່ອຍເປັນຮູບຮີ ຫຼື ຮູບໄຂ່ກັບ, ປາຍໃບແຫຼມຫາກົມ, ໃບກວ້າງ 3-5 ຊັງຕີແມັດ ແລະ ຍາວ 8-14 ຊັງຕີແມັດ, ແຜ່ນໃບລຽບ, ຜິວໃບທັງສອງດ້ານມີຈຸດຕ່ອມ, ຫຼັງໃບລຽບລື່ນສີຂຽວເຂັ້ມເປັນມັນ, ສ່ວນທ້ອງໃບລຽບເປັນສີອ່ອນກວ່າ. ອອກດອກເປັນຊໍ່ແຕກຂະແໜງ ຫຼື ອອກເປັນກະຈຸກ 12-15 ດອກ, ດອກມີຂະໜາດນ້ອຍເປັນສີຂາວ, ມີກິ່ນຫອມ ໂດຍຈະອອກຕາມງ່າມໃບ ແລະ ປາຍກິ່ງ, ກີບດອກເປັນສີຂາວ, ມີ 5 ກີບ, ອອກດອກໃນຊ່ວງປະມານເດືອນກຸມພາຫາເດືອນເມສາ. ລັກສະນະຂອງໝາກເປັນຮູບຊົງກົມຂະໜາດນ້ອຍ, ປາຍໝາກແຫຼມ, ຜິວລຽບ, ໝາກອ່ອນເປັນສີຂຽວ ເມື່ອສຸກແລ້ວຈະປ່ຽນເປັນສີບົວໃສ, ມີລົດຫວານ, ພາຍໃນໝາກມີແກ່ນສີດໍາ 1 ແກ່ນ, ແກ່ນມີລັກສະນະກົມເປັນລາຍ, ໝາກອອກໃນຊ່ວງເດືອນມີນາ.
ປະໂຫຍດ ແລະ ສັບພະຄຸນ:
- ໝາກສຸກມີລົດຫວານໃຊ້ຮັບປະທານໄດ້ ແຕ່ມີກິ່ນຂິວ.
- ເນື້ອໄມ້ໃຊ້ເຮັດເຄື່ອງມືທາງການກະເສດ.
- ໃບໃຊ້ຕົ້ມກັບນໍ້າກິນເປັນຢາຫຼຸດນໍ້າຕານໃນເລືອດ, ແກ້ເບົາຫວານ.
- ຮາກ ແລະ ໃບໃຊ້ຕົ້ມກັບນໍ້າດື່ມເປັນຢາແກ້ໄອ, ແກ້ໄຂ້.
- ຮາກ ແລະ ໃບໃຊ້ຕົ້ມກັບນໍ້າດື່ມເປັນຢາແກ້ພະຍາດຖອກທ້ອງ.
- ເນື້ອໄມ້, ເປືອກຕົ້ນ ແລະ ຮາກ ມີສັບພະຄຸນເປັນຢາຂັບນໍ້ານົມ.
- ໃບນໍາມາບົດປະສົມກັບຂິງ ໃຊ້ຮັກສາຜິວໜັງອັກເສບ, ເປັນຕຸ່ມພຸພອງ ຫຼື ຄັນອັກເສບ.
- ດອກ ແລະ ໝາກມີລົດເມົາຮ້ອນໃຊ້ເປັນຢາແກ້ຫິດ.
ຂໍ້ຄວນລະວັງ: ຍາງຈາກທຸກສ່ວນຂອງລໍາຕົ້ນມີລິດເຮັດໃຫ້ອາຈຽນ, ບ້າ ແລະ ເສຍຊີວິດໄດ້.