ໄມ້ເຕັນ / Duabanga

ຕົ້ນເຕັນຈັດເປັນໄມ້ຢືນຕົ້ນຂະໜາດໃຫຍ່, ລໍາຕົ້ນມີລັກສະນະຊື່, ມີຄວາມສູງ 15-35 ມ, ໂດຍວັດຮອບລໍາຕົ້ນໄດ້ 100-200 ຊມ, ເປືອກເປັນສະເກັດ ຫຼື ຕົກເປັນແຜ່ນບໍ່ເປັນລະບຽບ, ເປືອກເປັນສີນໍ້າຕານແດງເຂັ້ມ. ໃບເປັນໃບດ່ຽວ, ອອກລຽງກົງກັນຂ້າມກັນເປັນຄູ່ໆ, ລັກສະນະຂອງໃບເປັນຮູບຂອບຂະໜານ, ປາຍໃບແຫຼມເປັນຕິ່ງສັ້ນ, ໃບກວ້າງ 4-10 ຊມ ແລະ ຍາວ 10-24 ຊມ, ເນື້ອໃບຂ້ອນຂ້າງກ້ຽງ ແລະ ໜາ, ຜິວດ້ານເທິງກ້ຽງເປັນສີຂຽວເຂັ້ມ ສ່ວນທ້ອງໃບມີນວນ ຫຼື ເປັນຄາບຂາວ. ອອກດອກເປັນຊໍ່ກະຈະ, ໂດຍຈະອອກຢູ່ປາຍກິ່ງ, ດອກມີຈໍານວນຫຼາຍປະມານ 15-30 ດອກ, ດອກຈະບານໃນຊ່ວງເວລາກາງຄືນຫາເຊົ້າ ແລະ ຈະຫຸບໃນຊ່ວງກາງວັນ, ເປັນດອກສົມບູນເພດ, ດອກເປັນສີຂາວໃຫຍ່, ກາບດອກເປັນຮູບຖ້ວຍ, ປາຍແຍກເປັນ 6-7 ແຊກ, ສ່ວນກີບດອກມີ 6-7 ກີບ. ໝາກເປັນໝາກແຫ້ງ, ລັກສະນະຂອງໝາກເປັນຮູບໄຂ່ແກມຊົງກົມ, ຮູບໄຂ່ກວ້າງ, ຮູບກົມແປ້ນ, ໝາກເປັນສີຂຽວແລ້ວຈະປ່ຽນເປັນສີນໍ້າຕານເມື່ອແກ່ ແລະ ແຕກອ້າອອກເຄິ່ງກາງພູເປັນສ່ຽງໆ, ຢູ່ຖານມີກາບຮອງເປັນຮູບດາວ, ພາຍໃນໝາກມີແກ່ນ 6-7 ແກ່ນ, ໂດຍຈະເປັນໝາກໃນຊ່ວງເດືອນມີນາຫາເດືອນພຶດສະພາ ແລະ ໝາກຈະແກ່ເຕັມທີ່ໃນຊ່ວງເດືອນພຶດສະພາຫາເດືອນມີຖຸນາ.