ຕົ້ນດອກນໍ / Negkassar

ຕົ້ນດອກນໍຈັດເປັນພັນໄມ້ຢືນຕົ້ນຂະໜາດກາງ, ສູງ 10-15 ມ, ແຕກກິ່ງກ້ານແຜ່ກວ້າງ, ເປືອກລໍາຕົ້ນເປັນສີເທົາອົມນໍ້າຕານຫາດໍາ, ເປືອກເນື້ອໄມ້ເປັນສີນໍ້າຕານປົນແດງ, ຂະຫຍາຍພັນດ້ວຍການໃຊ້ແກ່ນ ແລະ ການຕອນກິ່ງ. ມີໃບເປັນດ່ຽວອອກລຽງກົງກັນຂ້າມສະລັບຕັ້ງສາກ, ໃບມີລັກສະນະເປັນຮູບໄຂ່ກັບ ຫຼື ເປັນຮູບຮີແກມຂອບຂະໜານ, ປາຍມົນກວ້າງໆ, ໃບກວ້າງ 2.5-7 ຊມ ແລະ ຍາວ 7.5-25 ຊມ, ແຜ່ນໃບກ້ຽງສີຂຽວເຂັ້ມເປັນມັນ, ທ້ອງໃບຈະສີອ່ອນກວ່າ, ເນື້ອໃບຄ່ອນຂ້າງລຽບ. ອອກດອກດ່ຽວ ຫຼື ເປັນຊໍ່ກະຈຸກຕາມກິ່ງ, ດອກຍ່ອຍເປັນສີຂາວ, ມີກິ່ນຫອມຫຼາຍ, ກີບດອກມີ 4 ກີບ, ສ່ວນກາບດອກມີ 2 ກີບ. ໝາກມີລັກສະນະເປັນຮູບກະສວຍ ຫຼື ກົມຣີ, ຂະໜາດ 2.5-5 ຊມ, ຜິວໝາກລຽບ, ໝາກອ່ອນເປັນສີຂຽວ, ໝາກສຸກເປັນສີເຫຼືອງອົມສົ້ມ, ເນື້ອໝາກນິ່ມ, ໝາກເມື່ອແກ່ຈະແຕກອອກໄດ້ ແລະ ມີແກ່ນດຽວ.