ຕົ້ນຊ້າເຫຼົ້າໃຫຍ່ / Spinus kino tree

ຕົ້ນຊ້າເຫຼົ້າໃຫຍ່ຈັດເປັນໄມ້ຟຸ່ມ, ລໍາຕົ້ນຕັ້ງຊື່, ສູງໄດ້ເຖິງ 20 ມ, ເປືອກຕົ້ນອ່ອນເປັນສີເທົາອ່ອນ ຫຼື ສີນໍ້າຕານເທົາ, ຜິວລຽບ, ສ່ວນຕົ້ນແກ່ເປືອກຕົ້ນຈະປ່ຽນເປັນສີນໍ້າຕານແກ່, ແຕກເປັນຮ່ອງຍາວ ແລະ ມີໜາມຂະໜາດໃຫຍ່ຂຶ້ນບໍລິເວນລໍາຕົ້ນ. ໃບເປັນດ່ຽວ, ອອກລຽງສະຫຼັບກັນ, ລັກສະນະຂອງໃບເປັນຮູບຣີແກມຮູບຂອບຂະໜານ, ປາຍໃບແຫຼມ ຫຼື ມົນ, ສ່ວນຂອບໃບລຽບ ຫຼື ເປັນຄື່ນເລັກນ້ອຍ, ໃບກວ້າງ 4-9 ຊມ ແລະ ຍາວ 8-20 ຊມ, ໃບລຽງຕົວເປັນແນວລະນາບ, ຍອດອ່ອນມີຂົນສີເທົາ, ແຕ່ໃບແກ່ດ້ານເທິງກ້ຽງ, ສ່ວນດ້ານດ້ານເທິງມີຂົນ ຫຼື ລຽບກ້ຽງ, ເນື້ອໃບໜາ, ທ້ອງໃບມີຂົນນຸ່ມສີຂາວ, ໃບເມື່ອແກ່ຈະປ່ຽນເປັນສີນໍ້າຕານອອກບົວ. ອອກດອກເປັນຊໍ່ເຊິງລົດແຍກຂະແໜງຕາມງ່າມໃບ ແລະ ມັກອອກຢູ່ປາຍຍອດກິ່ງ, ຊໍ່ດອກມີລັກສະນະຍາວ, ຊໍ່ແໜ້ນ, ມີດອກຈໍານວນຫຼາຍປະມານ 8-15 ດອກ, ດອກມີຂະໜາດນ້ອຍ, ກີບດອກເປັນສີຂຽວອອກເຫຼືອງອາດຈະມີສີສົ້ມ ຫຼື ສີແດງປະປົນ. ໝາກເປັນໝາກສົດຊໍ່ານໍ້າ, ໝາກເປັນຮູບຊົງກົມ ຫຼື ຮູບໄຂ່, ແຂງ ແລະ ບໍ່ແຕກ, ມີຂະໜາດ 0.5-0.9 ຊມ, ໝາກອ່ອນຈະເປັນສີຂຽວ ເມື່ອສຸກແລ້ວຈະປ່ຽນເປັນສີດໍາ ຫຼື ສີຟ້າປົນມ່ວງ, ເນື້ອໃນໝາກບາງ, ເປັນໝາກທີ່ມີແກ່ນດຽວ, ແກ່ນຂ້ອນຂ້າງກົມ, ມີສີນໍ້າຕານ.