ແມງອໍ້ຄໍລາຍ / Rice Grasshopper
APA 6th ed. ແມງອໍ້ຄໍລາຍ / Rice Grasshopper. (2019, December 5). Retrieved from https://www.phakhaolao.la/kb/0000575
MLA 8th ed. ແມງອໍ້ຄໍລາຍ / Rice Grasshopper. Pha Khao Lao, 5 December 2019, https://www.phakhaolao.la/kb/0000575.
Chicago 17th ed. Pha Khao Lao. 2019. "ແມງອໍ້ຄໍລາຍ / Rice Grasshopper." Published December 5, 2019. https://www.phakhaolao.la/kb/0000575.
Gryllus banian (Fabricius, 1798)
Hieroglyphus banian elongata (Uvarov, 1922)
Acridium furcifer Serville, 1838
Oxya furcifer (Serville, 1838)
Hieroglyphus furcifer (Serville, 1838)
Thai: ตั๊กแตนหนวดสั้น
ລັກສະນະທົ່ວໄປ: ແມງຕັກກະແຕນຕົ້ນເຂົ້າ ມີຮ່າງກາຍຂະໜາດປານກາງປະມານ 30-50 ມມ. ລໍ້າຕົວເປັນສີນໍ້າຕານແກ່, ສີຂຽວອ່ອນ ແລະ ໂຕອ່ອນມີສີຕ່າງໆເຊັ່ນ: ຂຽວອ່ອນ, ເຫຼືອງອ່ອນ, ນໍໍ້າຕານແດງ ແລະ ສີດໍາ. ດ້ານໜ້າພາກເປັນສີດໍໍາ, ທາງດ້ານທ້ອງມີຮອງສີດໍາ, ໂຕເຕັມໄວເປັນສີເຫຼືອງປົ່ນຂຽວ ຫຼື ນໍ້າຕານປົ່ນເຫຼືອງ. ຮ່າງກາຍຂອງແບ່ງອອກເປັນ 3 ສ່ວນຄື: ສ່ວນຫົວ, ສ່ວນເອີກ ແລະ ສ່ວນທ້ອງ. ລັກສະນະໜວດ: 1 ຄູ່ ສັ້ນ ເປັນແບບເສັ້ນດ້າຍ (Filiform). ລັກສະນະປາກ: ແບບກັດກິນ (Chewing type), ລັກສະນະປີກ: ເນື້ອປີກຂ້ອນຂ້າງໜາ 2 ຄູ່, ຄູ່ທໍາອິດຂ້ອນຂ້າງໜາ (Tegmina) ປົກຫຸມປີກຄູ່ຫຼັງ ແລະ ຄູ່ຫຼັງເປັນແຜນບາງໃສ (Membrane). ລັກສະນະຂາ: ມີ 3 ຄູ່ ເປັນແບບໄຕຄານ (Walking legs) ແຕ່ມີຂາຄູ່ຫຼັງຈະມີຂະໜາດໃຫຍ່ ແລະ ຂາປ້ອງ Femur ມີຂະໜາດໃຫຍ່ແຂງແຮງ, ປ້ອງ Tibia ຍາວ ມີໜາມລຽນກັນເປັນແຖວຈໍານວນຫຼາຍ ໄວ້ສຳລັບກະໂດດ (Jumping leg), ລັກສະນະຕາ: ຕາລວມ (Compound eyes) ຂະໜາດໃຫຍ່ 1 ຄູ່ ແລະ ຕາດ່ຽວ (Ocelli) ຢູ່ລະຫວ່າງກາງຂອງຕາລວມ. ແຫຼ່ງທີ່ພົບແມງຕັກກະແຕນຕົ້ນເຂົ້າ: ສາມາດພົບທົ່ວໄປຕາມທົ່ງຫຍ້າ, ຕາມທົ່ງນາ, ເດີນຫຍ້າ, ຕາມສວນກະສີກຳ. ອາຫານຂອງແມງຕັກກະແຕນຕົ້ນເຂົ້າ: ໂຕອ່ອນ ແລະ ໂຕເຕັມໄວກິນພືດເປັນອາຫານ.
ສາມາດພົບໄດ້ທົ່ວທຸກພາກຂອງ ສປປລາວ ທີ່ປະຊາຊົນບັນດາເຜົ່ານິຍົມນໍາມາປຸ່ງແຕ່ງເປັນອາຫານ ທີ່ສາມາດໃຫ້ສານອາຫານສູງຈຳພວກທາດໂປຼຕີນ (Protein), ນໍາມາຂາຍເປັນສິນຄ້າ, ນໍາມາເປັນອາຫານຂອງສັດ. ລາຄາຂາຍຕັກກະແຕນຕົ້ນເຂົ້າຕາມທ້ອງຕະຫຼາດ 20,000-30,000 ກີບ/ກິໂລກຣາມ.
ການສືບພັນ (Reproduction): ການສືບພັນ ແລະ ວົງຈອນຊີວິດຂອງແມງຕັກກະແຕນຕົ້ນເຂົ້າແມ່ນອາໄສເພດຜູ້ ແລະ ເພດແມ່ ໃນການສືບພັນ. ການປະສົມພັນຈະຢູ່ໃນລະຫວ່າງເດືອນ 10-12.
ໄລຍະໄຂ່ (Eggs): ຕົວແມ່ 1 ຕົວ ຈະວາງໄຂ່ປະມານ 30-40 ໜ່ວຍ, ໄຂ່ຈະແຕກອອກເປັນໂຕອ່ອນລະຫວ່າງເດືອນ 5-6. ໄຂ່ມີຄວາມກວ້າງປະມານ 1,5-2 ມມ ແລະ ຍາວປະມານ 3-5 ມມ. ການຈະວາງໄຂ່ເປັນກຸມໆຕາມພື້ນດິນ ກຸມໜຶ່ງປະມານ 5-10 ໜ່ວຍ. ໄຂ່ມີລັກສະນະເປັນໜ່ວຍກົມຍາວຄືເມັດເຂົ້າສານສີເຫຼືອງອ່ອນ-ຂາວຂຸ້ນໄສ. ໄຂ່ຈະແຕກອອກເປັນໂຕອ່ອນປະມານ 4-5 ອາທິດ.
ໄລຍະເປັນໂຕອ່ອນ (Nymphs): ລັກສະນະຂອງໂຕອ່ອນຄ້າຍກັບພໍ່ແມ່ແຕ່ບໍ່ມີປີກ, ຕົວອ່ອນທີແຕກອອກຈາກໄຂ່ ໃໝ່ຈະເປັນສີນໍໍ້າຕານອ່ອນ. ຂະໜາດຮ່າງກາຍຕົວອ່ອນຄັ້ງທຳອິດປະມານ 1-2 ຊມ. ໂຕອ່ອນມີການລອກຄາບຈາກຕົວອ່ອນມາເປັນຕົວເຕັມໄວປະມານ 4-5 ຄັ້ງ.
ໄລຍະໂຕເຕັມໄວ (Adults): ຮ່າງກາຍຂະໜາດປານກາງປະມານ 30-50 ມມ. ລໍ້າຕົວເປັນສີນໍ້າຕານແກ່, ສີຂຽວອ່ອນ ແລະ ໂຕອ່ອນມີສີຕ່າງໆເຊັ່ນ: ຂຽວອ່ອນ, ເຫຼືອງອ່ອນ, ນໍໍ້າຕານແດງ ແລະ ສີດໍາ. ດ້ານໜ້າພາກເປັນສີດໍໍາ, ທາງດ້ານທ້ອງມີຮອງສີດໍາ, ໂຕເຕັມໄວເປັນສີເຫຼືອງປົ່ນຂຽວ ຫຼື ນໍ້າຕານປົ່ນເຫຼືອງ. ໜວດຍາວ 1 ຄູ່ ເປັນແບບເສັ້ນດາຍ (Filiform) ມີປ້ອງຈຳນວນຫຼາຍແຕ່ໜວດສັ້ນ. ມີຂາ 3 ຄູ່. ສ່ວນທ້ອງມີອະໄວຍະວະວາງໄຂ່ (Ovipositor) ທີ່ມີລັກສະນະຄ້າຍເຂັມທີ່ຢືດອອກມາຈາກສ່ວນທ້ອງ. ຂາຄູ່ຫຼັງປ້ອງ tibia ຈະປະກອບດ້ວຍໜາມລຽນເປັນແຖວຈໍານວນຫຼາຍ.