ເອື້ອງໄມ້ເທົ້າລຶສີ / Pendant Growing Dendrobium

ເກີດເປັນເຫງົ້າ, ລຳຕົ້ນເກີດຈຸ້ມກັນແລ້ວຫ້ອຍລົງ, ມີຂໍ້ 7-19 ປ້ອງ, ເປັນປ້ອງເປັນກີ້ວແຕ່ລະອັນ, ລຳຕົ້ນກົ່ງໂຄງ, ສີນ້ຳຕານເຂັ້ມປົນສີຂຽວ. ໃບຫຼົ່ນເມື່ອເລີ່ມອອກດອກ. ໃບຈັບແບບສະຫຼັບ, ແຜ່ນໃບຮູບຫອກ, ໂຄນໃບເກືອບຫຸ້ມລຳຕົ້ນ, ປາຍແຫຼມ. ໃບປະດັບເປັນແຜ່ນບາງ, ຄ້າຍຮູບເຮືອ. ຊໍ່ດອກເກີດຈາກຊອກໃບໃກ້ປາຍລຳຕົ້ນ, ມີດອກຈຳນວນໜ້ອຍ, ກ້ານຊໍ່ດອກສັ້ນໆ ເກີດຈາກລຳຕົ້ນທີ່ແກ່. ເມື່ອດອກບານມັກຈະມີກີ່ນຫອມ, ບານທານໄດ້ຫຼາຍວັນ, ມັກອອກດອກໃນຊ່ວງຕົ້ນລະດູຝົນ. ດອກເປັນສີຂາວປົນສີເຫຼືອງຢູ່ເຄີ່ງກາງກິບດອກ, ກາບດອກມັກເປັນຂາວປົນສີມ່ວງ.

ດອກເຜີ້ງຊະນີດນີ້ພົບຢູ່ ໄຮນານ, ຕິເບັດ (ຈີນ), ອະຊຳ, ບັງກລາເທດ, ມຽນມາ, ໄທ ແລະ ລາວ. ໃນທຳມະຊາດມັກພົບຕາມປ່າທີ່ຂ້ອນຂ້າງໂລ່ງແຈ້ງ,  ເກີດຈາກຕົ້ນໄມ້ຂະໜາດໃຫຍ່, ມັກອາກາດອົບອຸ່ນ, ເປັນພືດອີງອາໄສ ຫຼື ບາງຄັ້ງພົບຕາມຜາຫີນທີ່ໄດ້ຮັບແສງເຕັມທີ່, ຢູ່ໃນລະດັບຄວາມສູງຈາກໜ້ານ້ຳທະເລແຕ່ 800-1600 ມ.