ດອກໄສ້ໄກ່ / Dork Sai Kai

ເປັນໄມ້ຟຸ່ມເຄິ່ງໄມ້ເຄື່ອ. ລຳຕົ້ນເກາະພັນ, ຍອດອ່ອນມີຂົນອ່ອນນຸ້ມ. ໃບດ່ຽວອອກຮຽວກົງກັນຂ້າມສອງແຜ່ນພຽງສະຫຼັບຕັ້ງສາກ, ຮູບຫອກ, ກວ້າງ 1.5-4 ຊມ, ຍາວ 3.5-8 ຊມ, ໂຄນໃບມົນ, ຂອບລຽບ, ປາຍແຫຼມ, ແຜ່ນໃບໜາຄ້າຍຄືໜັງ, ຜິວໃບດ້ານເທິງສີຂຽວເຂັ້ມ, ຜິວໃບດ້ານລຸ່ມສີຂຽວອ່ອນ, ຜິວລຽບທັງສອງດ້ານຍົກເວັ້ນເສັ້ນກ່າງກາງໃບ. ກ້ານໃບຍາວ 5-6 ມມ, ມີຂົນ. ຊໍ່ດອກແບບກະຈຸກ, ອອກບໍລິເວນປາຍກິ່ງ. ດອກຍ່ອຍມີ 5-15 ດອກ, ສີຂາວ, ມີຂົນສັ້ນນຸ້ມ. ໃບປະດັບດອກຄ້າຍໃບ, ກວ້າງ 6-10 ຊມ, ຍາວ 10-30 ມມ. ກ້ານດອກຍາວ 1-3 ມມ. ກາບດອກເຊື່ອມຕິດກັນເປັນຫຼອດຍາວ 1-2 ມມ, ປາຍແຍກອອກເປັນ 6-8 ແສກ, ຮູບຫຼິ່ມແຄບ ຫຼື ຮູບສາມຫຼ່ຽມ. ກີບດອກເຊື່ອມຕິດກັນເປັນຫຼອດຍາວ 10-12 ມມ, ປາຍແຍກອອກເປັນ 6-8 ແສກ, ຮູບຂອບຂະໜານ ຫຼື ຮູບແຖບ, ກວ້າງ 1.5-2 ມມ, ຍາວ 5-6 ມມ, ມີກິ່ນຫອມ. ໝາກຮູບຮີ, ກວ້າງ 7-8 ມມ, ຍາວ 10-11 ມມ.