ຢາສູບ / Tobacco

ການນຳໃຊ້

ພືດເປັນຢາ

ນ້ຳມັນຫອມ

ຊື່ວິທະຍາສາດ / ຕະກຸນ

Nicotiana tabacum L. / SOLANACEAE

ຊື່ພ້ອງ

Nicotiana chinensis Fisch. ex Lehm.
Nicotiana fruticosa Moc. & Sessé ex Dunal
Nicotiana latissima Mill.
Nicotiana mexicana Schltdl.
Nicotiana mexicana var. rubriflora Dunal
Nicotiana pilosa Dunal
Nicotiana tabaca St.-Lag.

ຊື່ອື່ນ

ໄທ: ຢາຊຸລະ, ຢາຊຸ, ຢາອອກ, ສະຕູ້ ແລະ ຢາາສູບ
ສາຊາມັນ: Tobacco
ຈີນ: 煙草
ຫວຽດນາມ: Thuốc lá, Lão bẩu, Yên thảo ແລະ Jờ rào

ບັນຍາຍລັກສະນະພືດສາດ

ຈັດເປັນໄມ້ລົ້ມລຸກອາຍຸປີດຽວ. ລຳຕົ້ນແຕກກິ່ງກ້ານສາຂາຈຳນວນຫຼາຍ, ສູງ 0.6-2 ມ, ຕົ້ນ ແລະ ຍອດອ່ອນມີຂົນອ່ອນນຸ້ມປົກຄຸມຢ່າງໜາແໜ້ນ ແລະ ມີຕ່ອມນ້ຳຢາງໜຽວກະຈາຍຢູ່ທົ່ວລຳຕົ້ນ. ໃບດ່ຽວ, ອອກຮຽງກົງກັນຂ້າມສອງແຜ່ນພຽງສະຫຼັບຕັ້ງສາກ, ຮູບໄຂ່ປີ້ນ ຫຼື ຮູບໄຂ່ແກມຮູບຂອບຂະໜານ, ກ້ວາງ 10-20 ຊມ, ຍາວ 30-60 ຊມ, ໂຄນໃບຮຽວແຫຼມ, ຂອບລຽບ ຫຼື ເປັນຄື້ນເລັກນ້ອຍ, ປາຍແຫຼມ ຫຼື ຮຽວແຫຼມ, ຜິວໃບໜາຄ້າຍຄືໜັງ, ສີຂຽວ, ມີຂົນອ່ອນປົກຄຸມທັ້ງສອງດ້ານ. ຊໍ່ດອກແບບກະຈະ, ອອກບໍລິເວນປາຍໃບ. ດອກຍ່ອຍມີຈຳນວນຫຼາຍ, ສີບົວອ່ອນເກືອບສີຂາວ ຫຼື ສີແດງອ່ອນ. ກາບດອກເຊື່ອມຕິດກັນເປັນຮູບຖ້ວຍ, ປາຍແຍກ 5-6 ແສກ, ຮູບຫອກ, ສີຂຽວ, ມີຂົນອ່ອນນຸ້ມປົກຄຸມຢ່າງໜາແໜ້ນ. ກີບດອກເຊື່ອມຕິດກັນເປັນຮູບລະຄັງ, ປາຍແຍກ 5 ແສກ, ມີຂົນຂາວປົກຄຸມ. ໝາກແຫ້ງແບບແຄັບຊູນ, ຮູບຂອບຂະໜານ, ໝາກອ່ອນເປັນສີຂຽວ, ໝາກແກ່ເປັນສີນ້ຳຕານ ແລະ ແຕກ. ແກ່ນມີຈຳນວນຫຼາຍ, ສີນ້ຳຕານ.

ບັນຍາຍການນຳໃຊ້

ສັບພະຄຸນ:

ໃບ: ເປັນຢາລະງັບປະສາດ, ເຮັດໃຫ້ນອນຫຼັບ ແລະ ຈ່ອຍ, ແກ້ຫວັດ (ເປັນຢາເສັ້ນປະສົມກັບປູນແດງ, ໃບນຽມ), ແກ້ຫອບຫືດ, ຂັບຂີ້ກະເທີ້, ເຮັດໃຫ້ປວດຮາກ, ຊ່ວຍຂັບພະຍາດພິດໃນລຳໄສ້, ຊ່ວຍຂັບປັດສະວະ, ແກ້ໜິ້ວ, ຢາໃຊ້ພາຍນອກແມ່ນໃຊ້ຮັກສາແຜ, ພອກຊ່ວຍຫ້າມເລືອດ, ຊ່ວຍແກ້ພິດງູ, ແກ້ລົມພິດ, ໃຊ້ຂ້າເຫົາ, ແກ້ອາກາເຈັບ, ຫຼຸດອາການບວມ, ແກ້ອາການເຈັບຂໍ້, ເຈັບຫົວ, ເຈັບແຂ້ວ ແລະ ແກ້ອາການເຈັບທ້ອງເກິດລູກ (ອິນເດຍ).
ຮາກ: ເປັນຢາຮັກສາພະຍາດຜິວໜັງ, ກາກເກື້ອນ, ເຮື້ອນ, ຜື່ນຄັນ ແລະ ຂີ້ຫິດ (ຮາກ, ໃບ).
ຢາເສັ້ນ: ເປັນຢາຖອນພິດ, ຮັກສາແຜນ້ຳຮ້ອນລວກ (ປະສົມກັບນ້ຳມັນໝາກພ້າວທາ).
ນິໂຄຕິນ: ໃຊ້ແກ້ໄຂ້ມາລາເລຍ ແລະ ແກ້ທາງເດີນປັດສະວະອັກເສບ. ນອກນີ້ແລ້ວຍັງສາມາດຮັກສາຄົນທີ່ເປັນພະຍາດໂຣກຈິດ ແລະ ເອົາໄຊເມີໃຫ້ດີຂຶ້ນອີກ.

ຄຸນປະໂຫຍດ: ໃຊ້ເປັນຢາຊີດຂ້າແມງໄມ້ ແລະ ເພ້ຍຕ່າງໆໄດ້ເປັນຢ່າງດີ, ເປັນຢາທາພາຍນອກປ້ອງກັນປີງ ແລະ ທາກກັດ, ນຳໃສ່ຮັ່ງໄຂ່ ຫຼື ຕຳໃສ່ນ້ຳສີດຮັ່ງໄຂ່ຂ້າໄຮໄກ ແລະ ຮັກສາຜິວໜັງງົວຄວາຍທີ່ເປັນໜອງ.

ນ້ຳມັນຫອມລະເຫີຍ: ທັັັັັັັັັັັັງຕົ້ນສາມານຳມາເປັນສະກັດເປັນຢາຂ້າແມງໄມ ແລະ ຂ້າເພຍທຸກຊະນິດ.

ໂທດ:

ເຮັດໃຫ້ມີອາການໄອ ແລະ ເຈັບຄໍ ເນື່ອງຈາກຄໍ ແລະ ຫຼອດລົມມີການອັກເສບບວມເຮັດໃຫ້ເກີດການເສບຕິດ, ເຮັດໃຫ້ຫົວໃຈເຮັດວຽກບໍ່ເຕັມທີ, ຫົວໃຈອ່ອນເພຍ ແລະ ເຕັ້ນບໍ່ສະໝໍ່າສະເໝີ, ຄວາມຈຳເຊື່ອມ, ຄວາມດັນເລືອດຕໍ່າ, ຫາຍໃຈອ່ອນ, ເຫື່ອອອກຫຼາຍຜິດປົກກະຕິ ແລະ ມີອາການມືສັ່ນ, ເຮັດໃຫ້ມີອາການໄອ, ຄໍແຫ້ງເຊິ່ງເປັນສາເຫດເຮັດໃຫ້ເກີດມະເລັງປອດ ແລະ ຫຼອດລົມແັກເສບ.
ຫາກສູບເປັນເວລາດົນຈະເຮັດໃຫ້ມີອາການເຈັບຫົວ, ງຸດງິດ, ມີອາການຄຽດງ່າຍ, ຂາດສະມາທິ ແລະ ນອນບໍ່ຫຼັບ.
ຄົນທີ່ສູບຢາມີໂອກາດສູງທີ່ຈະເປັນພະຍາດມະເລັງທີ່ປາກ, ກ່ອງສຽງ, ເຕົ້ານົມ, ກະເພາະ ລຳໄສ້, ຫຼອດອາຫານ, ຫຼອດໝາກໄຂ່ຫຼັງ, ຕັບອ່ອນ, ມົດລູກ ແລະ ເມັດເລືອດໄດ້. ເຊິ່ງເປັນເຫດເຮັດໃຫ້ຄົນສູບຢາມັກມີອາຍຸສັ້ນ ເພາະພະຍາດແຊກແຊງຫຼາຍຢ່າງ.
ຄວັນຢາສູບບໍ່ຂ້າສະເພາະຄົນທີ່ສູບເທົ່ານັ້ນແຕ່ຍັງເປັນອັນຕະລາຍຕໍ່ຄົນອ້ອມຂ້າງໄດ້ອີກດ້ວຍ.
ຢາສູບເປັນອັນຕະລາຍ ແລະ ໂທດຕໍ່ຮ່າງກາຍໃນໄລຍະຍາວ ໂດຍຈະໃຊ້ເວລາເປັນ 10 ປີເຮັດໃຫ້ຫຼາຍຄົນບໍ່ເອົາໃຈໃສ່ເຖິ່ງອັນຕະລາຍຂອງຢາສູບ.

ເອກະສານອ້າງອີງ / ການອ້າງອີງ

Lewis, R.S., Nicholson, J.S. (2007). Aspects of the evolution of Nicotiana tabacum L. and the status of the United States Nicotiana Germplasm Collection. Genet Resour Crop Evol 54:727–740.

Dmuchowski, W., Baczewska-Dąbrowska, A., Gozdowski, D., Brągoszewska, P., Gworek, B., Suwara, I., Chojnacki, T., Jóźwiak, A., Swiezewska, E. (2021). Effect of salt stress in urban conditions on two Acer species with different sensitivity. Dmuchowski et al.

Berbeć, A.K., Matyka, M. (2020). Biomass Characteristics and Energy Yields of Tobacco (Nicotiana tabacum L.) Cultivated in Eastern Poland. Agriculture, 10-551.

del Piano, L., Abet, M., Sorrentino, C., Barbato, L., Sicignano, M., Cozzolino, E., Cuciniello, A. (2008). Uptake and distribution of lead in tobacco (Nicotiana tabacum L.). Journal of Applied Botany and Food Quality 82: 21-2.

Darvishzadeh, R., Mirzaei, L., Hatami Maleki, H., Laurentin, H., Reza Alavi, S. (2013). Genetic variation in oriental tobacco (Nicotiana tabacum L.) by agromorphological traits and simple sequence repeat markers. Revista Ciência Agronômica, 44(2): 347-355.

ຜູ້ຮ່ວມມືໃນການສ້າງ

Duangkhae KEONOY