ຕົ້ນຄັດເຄົ້າ / Siamese Randia

ເປັນໄມ້ເຄືອເນື້ອໜຽວແຂງ ຫຼື ໄມ້ຟຸ່ມ, ຄວາມສູງ 3–6 ແມັດ, ເປືອກລຳຕົ້ນລຽບ ແລະ ເປັນສີນ້ຳຕານ. ໃບດ່ຽວຈັບກົງກັນຂ້າມກັນ, ແຜ່ນໃບເປັນຮູບຮີ, ປາຍໃບແຫຼມ, ຂອບໃບລຽບ, ກວ້າງ 4–5 ຊັງຕີແມັດ ແລະ ຍາວ 6–12 ຊັງຕີແມັດ, ຫຼັງໃບລຽບເປັນສີຂຽວເຂັ້ມ ແລະ ເປັນມັນ, ພື້ນໃບລຽບມື່ນ ແລະ ມີສີອ່ອນກວ່າ, ເນື້ອໃບໜຽວໜາແຂງ ແລະ ມີຫູໃບຂະໜາດນ້ອຍລັກສະນະເປັນຮູບສາມຫຼ່ຽມຢູ່ລະຫວ່າງກ້ານໃບ. ດອກເປັນຊໍ່ແບບກະຈຸກຕາມຊອກໃບໃກ້ປາຍກີ່ງ, ດອກເປັນຊໍ່ໃຫຍ່ ແຕ່ລະຊໍ່ດອກມີຂະໜາດ 4–10 ຊັງຕີແມັດ, ໃນແຕ່ລະຊໍ່ຈະມີດອກ 10–25 ດອກ. ດອກສີຂາວ ແລະ ມີກີ່ນຫອມ, ດອກມີເສັ້ນຜ່າສູນກາງປະມານ 1.5–2 ຊັງຕີແມັດ, ລັກສະນະຄ້າຍດອກເຂັມ ມີກິີບດອກ 5 ກີບ. ເມື່ອດອກບານເຕັມທີ່ກີບດອກຈະບິດຢູ່ໂຄນກີບດອກເຊື່ອມຕິດກັນເປັນຫຼອດສັ້ນ. ແຕ່ລະດອກຈະມີເກສອນເພດຜູ້ 5 ກ້ານຍື່ນຍາວພົ້ນກີບດອກ. ສ່ວນເກສອນເພດແມ່ເປັນຮູບກະສວຍສີຂາວ ຫຼື ເປັນຮູບແຖບເສັ້ນຢູ່ລະຫວ່າງກີບດອກ 6 ແຖບ, ກາບດອກເປັນສີຂາວອົມສີຂຽວໂຄນເຊື່ອມຕິດກັນເປັນຫຼອດ, ປາຍແຍກເປັນແສກແຫຼມ, ດອກຈະບານພ້ອມກັນທັງຊໍ່. ເມື່ອດອກທີ່ເລີ່ມບານຈະເປັນສີຂາວນວນແລ້ວຈະປ່ຽນເປັນສີເຫຼືອງນວນໃນວັນຕໍ່ມາ. ໝາກເປັນຮູບຊົງກົມ, ຜີວໝາກລຽບ ແລະ ເປັນມັນ. ໝາກມີຂະໜາດເສັ້ນຜ່າສູນກາງປະມານ 1–15 ຊັງຕີແມັດ, ສີຂຽວເຂັ້ມ ເມື່ອໝາກສຸກເຕັມທີ່ຈະປ່ຽນເປັນສີດຳ.