ຕົ້ນຍົມຫີນ / Almond-wood

ຕົ້ນຍົມຫີນຈັດເປັນພັນໄມ້ຂະໜາດກາງຫາໃຫຍ່, ສູງ 15-25 ມ, ເປືອກຕົ້ນເປັນສີນໍ້າຕານຄໍ້າ, ສີເທົາ ຫຼື ສີເທົາປົນດໍາ, ເປືອກຊັ້ນໃນເປັນສີແດງອອກນໍ້າຕານ ຫຼື ສີບົວ, ສ່ວນກະພີ້ເປັນສີເຫຼືອງ ແລະ ແກນໄມ້ເປັນສີເຫຼືອງເຂັ້ມ. ໃບເປັນໃບປະສົມແບບຂົນນົກ, ກ້ານໃບຍາວ 30-60 ຊມ, ມີໃບຍ່ອຍ 6-20 ຄູ່ ຈັດລຽງຕົວກັນແບບສະລັບ, ແຕ່ໃບຍ່ອຍ 2 ຄູ່ທໍາອິດລຽງຕົວກັນແບບກົງກັນຂ້າມ. ອອກດອກເປັນຊໍ່ຕາມມຸມກິ່ງອ່ອນ ຫຼື ຕາມປາຍຍອດ, ປາຍຊໍ່ຫ້ອຍລົງ, ມີຄວາມຍາວ 10-30 ຊມ, ດອກຍົມຫີນມີຂະໜາດນ້ອຍ ແລະ ກິ່ນຫອມ, ເປັນດອກຊະນິດມີເພດດຽວ ແລະ ດອກແບບສົມບູນເພດ, ກີບດອກມີ 4-5 ກີບ ຕິດກັບກາບດອກເປັນສີຂຽວອອກມ່ວງ ຫຼື ສີແດງ, ກາບດອກມີປາຍມົນ. ໝາກອອກເປັນພວງ ລັກສະນະຂອງໝາກເປັນຮູບຊົງຮີ ຫຼື ຮູບໄຂ່, ໝາກເປັນແບບໝາກແຫ້ງມີເປືອກແຂງສີນໍ້າຕານ, ປາຍໝາກເປັນຕິ່ງແຫຼມ, ໝາກເປັນສີນໍ້າຕານເມື່ອສຸກຈະປ່ຽນເປັນສີດໍາ, ເມື່ອແຫ້ງ ຫຼື ແກ່ຈະແຕກເປັນ 3-5 ແຊກ, ພາຍໃນໝາກແບ່ງອອກເປັນຊ່ອງ 3-5 ຊ່ອງ, ມີແກ່ນລັກສະນະແປເປັນແຜ່ນບາງໆສີນໍ້າຕານ.