ປາເໝັ້ນ / Elephant Ear Fish

ການນຳໃຊ້

ອາຫານ

ສີນຄ້າ

ຊື່ວິທະຍາສາດ / ຕະກຸນ

Osphronemus exodon (Roberts, 1994) / Osphronemidae

ຊື່ພ້ອງ

ຊື່ອື່ນ

Thai: ปลาแรดแม่น้ำโขง
Cambodian: ត្រី រនេាស

ສະຖານະພາບການອະນຸລັກ

Vulnerable

ພັນລະນາລັກສະນະສັນຖານ

ຮູບຮ່າງຄ້າຍປາກະເດີດ, ແຕ່ມີຂະໜາດໃຫຍ່ກວ່າ, ໂຕໃຫຍ່ເຕັມໄວຍາວປະມານ 60 ຊັງຕິແມັດ. ໂຕເຕັມໄວ ແລະ ໂຕໄວປານກາງຈະມີຮູບຮ່າງຄ່ອນຂ້າງແຕກຕ່າງກັນ. ໂຕອ່ອນ ແລະ ໄວກາງຈະມີ 6-7 ແຖບສີດຳຕາມລວງຂວາງຂອງລຳໂຕ ແລະ ມີຈຸດສີດຳເຂັ້ມຕາມແຖບ ເຊິ່ງເມື່ອໃຫຍ່ແລ້ວຈະຫາຍໄປ. ຈະມີສີສົ້ມກະຈາຍຢູ່ດ້ານທ້ອງຂອງສ່ວນຫົວ ເຊິ່ງບໍ່ພົບໃນຊະນິດອື່ນໃນສະກຸນນີ້. ໂຕເຕັມໄວມັກຈະເປັນສີດຳທົ່ວໂຕ, ຈະເຂັ້ມໄປຫາດ້ານຫຼັງ ແລະ ເປັນສີຈາງດ້ານທ້ອງ.
ຄີຫຼັງມີງ່ຽງ 14-16 ອັນ ແລະ ງ່ຽງອ່ອນ 10-11 ອັນ. ຄີກົ້ນມີງ່ຽງ 11-13 ອັນ ແລະ ງ່ຽງອ່ອນ 17-19 ອັນ. ຄີຫາງເປັນແຜ່ນປາຍຕັດ ຫຼື ວ້ຳເລັກນ້ອຍ, ປາຍມັກເປັນສີແດງສົ້ມ.

ບັນຍາຍການນຳໃຊ້

ເປັນປານ້ຳຂອງອີກຊະນິດໜື່ງທີ່ຄ່ອນຂ້າງຫາຍາກ ແລະ ພົບໜ້ອຍຄັ້ງໃນຕະຫຼາດຕາມຕົວເມືອງຕ່າງໆທີ່ຕິດກັບແມ່ນ້ຳຂອງ. ນິຍົມນຳມາເຮັດສົ້ມປາ ແລະ ລາບ. ບາງຄັ້ງແກງໃສ່ສົ້ມປ່ອຍ ຫຼື ສົ້ມຜັກຕິ້ວ. ນອກນັ້ນຍັງນິຍົມເຮັດເປັນປາແດດດຽວ ແລະ ນຳມາທອດ.

ການສຶບພັນ ແລະ ວົງຈອນຊີວິດ

ອາຫານຂອງປາເໜັ້ນແມ່ນພືດນ້ຳເປັນສ່ວນຫຼາຍ, ບາງຄັ້ງກໍ່ກີນພວກແມງໄມ້ ແລະ ສັດນ້ຳຂະໜາດນ້ອຍ.

ການປະສົມພັນ ແລະ ການວາງໄຂ່ແມ່ນຕາມໜອງ ຫຼື ບືງ ໃນຊ່ວງລະດູຝົນ. ໄຂ່ຈະວາງຕາມຮາກພືດໂດຍສະເພາະແມ່ນຕາມຮາກຕົ້ນໄຄ້ນ້ຳ, ຕົວອ່ອນແມ່ຈະເຝົ້າລະວັງອັນຕະລາຍ ແລະ ປົກປ້ອງ.

ຄຸນລັກສະນະຂອງນ້ຳທີ່ປາເໝັ້ນອາໄສຢູ່ໄດ້ໃນອຸນຫະພູມ 20-30 ອົງສາ. ຄ່າພີເອັສ (pH): 6.5-8.0 ແລະ ຄວາມຂຸ່ນຂອງນ້ຳ: 5-25°H.

ເອກະສານອ້າງອີງ / ການອ້າງອີງ

IUCN, 2019. The IUCN Red List of Threatened Species. Version 2019-2. . Downloaded on 23 July 2019.

Poulsen, A.F., and Valbo-Jørgensen, J. (2000). Fish Migrations and Spawning Habits in the Mekong Mainstream - A Survey using Local Knowledge. AMFC Technical Report. Mekong River Commission, Phnom Penh, Cambodia.

Roberts, T.R. (1994). Osphronemus exodon, a new species of giant gourami with extraordinary dentition from the Mekong. Natural History Bulletin of the Siam Society 42(1): 67–77.

Rainboth, W.J., 1996. Fishes of the Cambodian Mekong. FAO species identification field guide for fishery purposes. FAO, Rome, 265 p.