ຜັກສະລັດ / Lettuce

ຜັກສະລັດ ລັກສະນະຂອງຕົ້ນໃນໄລຍະທໍາອິດມັກຈະເບິ່ງບໍ່ເຫັນເພາະໃບປົກຄຸມໄວ້, ແຕ່ຈະເຫັນໃນໄລຍະອອກດອກ, ລໍາຕົ້ນມີລັກສະນະເປັນຂໍ້ສັ້ນ ໂດຍແຕ່ລະຂໍ້ຈະເປັນບ່ອນເກີດຂອງໃບ, ລັກສະນະຂອງຕົ້ນຂ້ອນຂ້າງຕຸ້ຍ ແລະ ຕັ້ງຊື່. ຮາກເປັນລະບົບຮາກແກ້ວທີ່ແຂງແຮງ ແລະ ອວບ. ໃບມີສີຂຽວອ່ອນ, ສີຂຽວປົນເຫຼືອງ, ໄປຈົນເຖິງສີຂຽວແກ່, ແຕ່ບາງສາຍພັນຈະມີສີແດງ ຫຼື ສີນໍ້າຕານປົນຢູ່ເຮັດໃຫ້ມີສີແດງ, ສີເທົາ ຫຼື ສີນໍ້າຕານປົນຂຽວ, ໃບຈະແຕກອອກຈາກລໍາຕົ້ນໂດຍຮອບ, ໂດຍພັນທີຫໍ່ເປັນຫົວຈະມີໃບໜາ ແລະ ມີເນື້ອໃບອ່ອນນຸ່ມ, ບາງຊະນິດຈະເປັນໃບມ້ວນງໍ ເຫັນເສັ້ນໃບໄດ້ຊັດເຈນ. ອອກດອກເປັນຊໍ່ລວມ ປະກອບໄປດ້ວຍກຸ່ມຂອງດອກທີ່ຢູ່ກັນເປັນກະຈຸກຢູ່ຢອດ ໃນແຕ່ລະກະຈຸກປະກອບໄປດ້ວຍດອກຍ່ອຍປະມານ 15-25ດອກ ຫຼື ຫຼາຍກວ່ານັ້ນ, ດອກທໍາອິດຈະເກີດຢູ່ບໍລິເວນຍອດອ່ອນຫຼັງຈາກນັ້ນຈະເກີດຢູ່ບໍລິເວນງ່າມໃບ, ດອກເປັນດອກສົມບູນເພດ ກີບດອກມີສີເຫຼືອງ. ແກ່ນຜັກສະລັດເປັນແກ່ນຜັກຊະນິດດຽວທີ່ຈະເລີນມາຈາກຮັງໄຂ່ອັນດຽວ, ແກ່ນມີລັກສະນະແປຍາວ ຫົວທ້າຍແຫຼມຄືຮູບຫອກ ແລະ ມີເສັ້ນນ້ອຍໆລາດຍາວໄປຕາມຄວາມຍາວຂອງແກ່ນ.