ໝາກກໍ່ເດືອຍນ້ອຍ / Mark ko deua

ເປັນໄມ້ຢືນຕົ້ນຂະໜາດກາງ ຫຼື ຂະໜາດໃຫຍ່. ລຳຕົ້ນສູງ 10-40 ມ, ກິ່ງກ້ານລຽບ, ສີນ້ຳຕານປົນສີແດງ, ເປືອກມີຮອຍແຕກເລິກ, ມີເກັດ, ເປືອກສີນ້ຳຕານປົນສີມົ່ນ, ເນື້ອໄມ້ສີຂາວ. ໃບດ່ຽວ, ຈັບຮຽງສະຫຼັບ, ຮູບຮີ, ຮູບຂອບຂະໜານ ຫຼື ຮູບຫອກ, ກວ້າງ 1.5-4 ຊມ, ຍາວ 5.5-13 ຊມ, ໂຄນໃບບ້ຽວ, ຂອບເປັນຄື້ນ, ແຜ່ນໃບໜາ, ຜິວໃບດ້ານເທິງສີຂຽວເຂັ້ມ, ລຽບມັນ, ຜິວໃບດ້ານລຸ່ມສີນ້ຳຕານປົນສີແດງ. ກ້ານໃບຍາວ 1-1.4 ຊມ, ມີຂົນອ່ອນນຸ້ມກະຈາຍຢູ່ທົ່ວ. ຊໍ່ດອກແຍກເພດໃນຕົນດຽວກັນ, ອອກບໍລິເວນປາຍກິ່ງ ຫຼື ງ່າມໃບ. ຊໍ່ດອກເພດຜູ້ເປັນຊໍ່ແບບແຕກແໜ່ງ, ຍາວປະມານ 15 ຊມ. ດອກຍ່ອຍມີຂະໜາດນ້ອຍ, ສີເຫຼືອງ, ມີກິ່ນຫອມ. ກາບດອກ ຫຼື ກີບລວມມີ 6 ກີບ, ແຍກກັນອິດສະຫຼະ, ຮູບໄຂ່ ຫຼື ຮູບໄຂ່ປີ້ນ, ມີຂົນອ່ອນນຸ່ມບໍລິເວນຜິວດ້ານນອກ ແລະ ຂອບ. ເກສອນເພດຜູ້ມີ 10-12 ອັນ, ກ້ຽງ. ມີເຕົ້າໄຂ່ທີ່ເປັນໝັນ, ຮູບກົມ, ມີຂົນປົກຫຸ້ມ. ຊໍ່ດອກເພດແມ່ເປັນຊໍ່ດອກດຽວ, ບໍ່ແຕກແໜງ, ຍາວປະມານ 15 ຊມ. ດອກຍ່ອຍລັກສະນະທົ່ວໄປຄ້າຍດອກເພດຜູ້. ເກສອນເພດຜູ້ມີ 10-12 ອັນ, ເປັນໝັນ. ເຕົ້າໄຂ່ມີ 3 ຫ້ອງ, ແຕ່ລະຫ້ອງມີ 2 ເມັດໄຂ່, ຮູບກົມ, ປາຍຮວງຮັບແຍກອອກຈາກກັນເປັນ 3 ແສກ, ກ້ຽງ. ໝາກຮູບກົມ, ກ້ວາງ 0.8-1.3 ຊມ, ຍາວ 1-1.5 ຊມ, ເປືອກມີໜາມແຂງປາຍຈາຍຢ່າງໜາແໜ້ນ, ປາຍໜາມໂຄ້ງງໍເລັກນ້ອຍ. ແກ່ນມີ 1 ແກ່ນຕໍ່ແສກ, ຮູບກົມ, ເສັ້ນຜ່າສູນກາງປະມານ 1 ຊມ, ຜິວລຽບ.