ເອື້ອງໂມກ / Terete Leaf Papilionanthe

ເປັນດອກເຜິ້ງທີ່ມີກີ່ງງ່າ, ທີ່ມີລຳຕົ້ນຮຽວຍາວ, ຕັ້ງຊື່ ຫຼື ໂຄດໂຄງໄປມາ, ໃບເປັນທ້ອນກົມຄ້າຍຄືລຳຕົ້ນ, ຕິດຢູ່ທົນຈົນຮອດອອກໃບ. ຊໍ່ດອກອອກຕໍ່ກົງກັນຂ້າງກັບໃບ, ຊໍ່ດອກຕໍ່ຊື່ ຫຼື ເອັນເລັກນ້ອຍ, ຍາວເຖີງ 15-30 ຊມ, ມີດອກຈຳນວນ 3-6 ດອກຕໍ່ຊໍ່, ດອກເກີດ ລຽນກັນຕາມກ້ານຊໍ່ດອກທີ່ຊິກແຊກໄປມາ. ດອກສີບົວປົນສີເຫຼືອງ ແລະ ມີຈຸດເປັນສີນ້ຳຕານ, ດອກມີກີ່ນຫອມອ່ອນ.

ດອກເຜິ້ງຊະນິດນີ້ພົບຢູ່ຈິນ, ອະຊຳ, ບັງກລາເທດ, ອິນເດຍ, ເນປານ, ມຽນມາ, ໄທ, ລາວ ແລະ ຫວຽດນາມ. ໃນທຳມະຊາດ ມັກພົບຕາປ່າໂຄກ, ຜາຫິນປູນຕາມປ່າປະສົມປ່ຽນໃບ, ເປັນລຳຍາວຂະຫຍາຍຕົວໄປທາງປາຍຍອດ. ພົບຢູ່ສູງຈາກລະດັບຄວາມສູງຈາກໜ້ານ້ຳທະເລແຕ່ 200 ຫາ 1200 ມ.