ການປູກໝາກອຶ

ການກະກຽມດິນ ແລະ ຄ້າງ
   ຂຸດຂຸມຂະໜາດ 30x30x30 ຊມ ໃສ່ຝຸ່ນຄອກ ຫຼື ຝຸ່ນບົ່ມໃຫ້ພຽງພໍ ແລະ ຕັ້ງຄ້າງໃຫ້ແໜ້ນໜາໃສ່ບໍລິເວນປາກຂຸມຕາມຂະໜາດທີ່ເໝາະສົມ (ໂດຍສະເລ່ຍ 1 ເຄືອຕໍ່ 4 ຕາແມັດ).
ການປູກ
   ເອົາແກ່ນໝາກອຶປູກໃສ່ຂຸມທີ່ໄດ້ກະກຽມໄວ້ເລິກປະມານ 3 ຊມ.
ການບົວລະບັດຮັກສາ 
  -  ຫົດນໍ້າໃຫ້ພຽງພໍຫຼັງຈາກຜັກຈະເລີນເຕີບໂຕດີ ແລະ ຍາວຂຶ້ນຄ້າງແລ້ວຈຶ່ງໃຫ້ນໍ້າໜ້ອຍລົງ, ຖ້າຍາວຮອດເຄິ່ງກາງຄ້າງແມ່ນໃຫ້ຕັດຍອດອອກເພື່ອໃຫ້ມັນແຕກງ່າ.
  -  ຖ້າວ່າຜັກຂະຫຍາຍຕົວຊ້າຄວນຈີ້ມດິນອ້ອມຕົ້ນໃສ່ຝຸ່ນຄອກ ຫຼື ຂີ້ເຖົ່າຕາມບໍລິເວນຕົ້ນ, ຫົດນ້ໍາໃຫ້ຊຸ່ມ.
  -  ຖ້າມີຮົ້ວແໜ້ນໜາອາດຈະໃຫ້ມັນຂຶ້ນຕາມຮົ້ວກໍໄດ້.
  -  ສີດຢາໝັກສະໝຸນໄພປ້ອງກັນພະຍາດ ແລະ ແມງໄມ້. 
ການເກັບກ່ຽວ
  ພືດຊະນິດນີ້ເຮົາສາມາດເກັບຍອດ ແລະ ໝາກມາປຸງແຕ່ງອາຫານໄດ້.  
ການເກັບ ແລະ ຮັກສາໄວ້ກິນຍາວນານ
  -  ເກັບຍອດ ຫຼື ໝາກລ້າງນໍ້າໃຫ້ສະອາດປະໃຫ້ນໍ້າສະເດັດ, ຫຼັງຈາກນັ້ນເອົາໃສ່ຖົງຢາງອັດໃຫ້ແໜ້ນເອົາເຂົ້າໄວ້ຕູ້ແຊ່ ຫຼື ຕູ້ເຢັນ. 
  -  ໝາກແມ່ນເກັບເອົາໜ່ວຍທີ່ແຂງແຮງ ແລະ ສຸກດີເກັບມ້ຽນໄວ້ທີ່ຮົ່ມ ແລະ ບ່ອນແຫ້ງດີ. 
ຄຸນຄ່າທາງໂພຊະນາການ:
  -  ໝາກອຶ ມີວິຕາມິນເອ (A), ບີ 1 (B1), ບີ 2 (B2), ບີ 3 (B3), ບີ 4 (B4), ບີ 5 (B5), ບີ 6 (B6), ຊີ(C), ອີ (E), ພີ (P), ແຄວຊຽມ (Ca), ທາດເຫຼັກ (Fe) ຊ່ວຍຫຼຸດນໍ້າຫນັກ, ລົດຄວາມອ້ວນ, ມີສານອະນຸມູນອິດສະລະເຮັດໃຫ້ຜິວຊຸ່ມຊື່ນ, ຮັກສາສາຍຕາ, ບໍາລຸງເສັ້ນປະສາດ, ອາລົມດີຊ່ວຍຫຼຸດນ້ໍາຕານໃນເລືອດ, ຫຼຸດຄວາມສ່ຽງຈາກການເກີດມະເຮັງ, ໂດຍສະເພາະແຄວຊຽມ ແລະ ທາດເຫຼັກຈໍາເປັນຫຼາຍສໍາລັບແມ່ຍິງໄວຈະເລີນພັນ ແລະ ແມ່ຍິງຖືພາ.

ຂໍ້ມູນຈາກ: ປື້ມເນື້ອໃນຄູ່ມືເຝິກອົບຮົມການຜະລິດກະສິກໍາຂອງສະຖານການສຶກສາ