ການນຳໃຊ້ປະໂຫຍດຈາກນ້ຳມ່າເຂົ້າ
ນໍ້າມ່າເຂົ້າອຸດົມໄປດ້ວຍສານອາຫານທີ່ມີປະໂຫຍດຫຼາຍຊະນິດ ລວທັງວິຕາມິນ B3 ແລະ ມີວິຕາມິນ B2 ຊ່ວຍປ້ອງກັນການອຸດຕັນຂອງເສັ້ນເລືອດ ແລະ ກຳຈັດໄຂມັນອີ່ມຕົວໃນເສັ້ນເລືອດໄດ້, ລວມທັງວິຕາມິນ B1 ເຊິ່ງມີປະໂຫຍດຕໍ່ການເຮັດວຽກຂອງສະໝອງ, ລະບົບປະສາດ, ອີກທັງຊ່ວຍໃນການຈະເຮັດໃຫ້ຈະເລີນອາຫານ ແລະ ຊ່ວຍໃນການຈະເລີນເຕີບໂຕຂອງຮ່າງກາຍອີກດ້ວຍ. ການນຳໃຊ້ນໍ້າມ່າເຂົ້າແມ່ນຄວນໃຊ້ນໍ້າທີສອງ ເນື່ອງຈາກນໍ້າທີໜຶ່ງເປັນນໍ້າທີ່ມີເສດຝຸ່ນຕ່າງໆປະປົນຢູ່. ການນຳໃຊ້ນໍ້າມ່າເຂົ້າໃຫ້ຖືກວິທີ ແລະ ມີຄຸນປະໂຫຍດດັ່ງນີ້:
ໃຊ້ລ້າງຜັກ ແລະ ໝາກໄມ້
ນ້ຳມ່າເຂົ້າສາມາດຊ່ວຍໃຫ້ຜັກ ແລະ ໝາກໄມ້ມີຄວາມສະອາດຫຼາຍຂຶ້ນ, ເຊິ່ງເຮົາຈະນຳໝາກໄມ້ມາລ້າງນໍ້າໃຫ້ສະອາດ ແລ້ວຈຶ່ງນຳມາແຊ່ນ້ຳມ່າເຂົ້າປະມານ 10-15 ນາທີ, ຫຼັງຈາກນັ້ນກໍນຳມາລ້າງດ້ວຍນ້ຳສະອາດອີກເທື່ອໜຶ່ງ ວິທີນີ້ຈະຊ່ວຍກຳຈັດສານເຄມີທີ່ມີໃນຜັກ ແລະ ໝາກໄມ້ໃຫ້ໜ້ອຍລົງໄດ້.
ໃຊ້ສະ ແລະ ນວດຜົມ
ຫຼັງຈາກທີ່ເຮົາສະຜົມດ້ວຍນ້ຳຢາສະຜົມແລ້ວແມ່ນໃຫ້ໃຊ້ນ້ຳມ່າເຂົ້າລ້າງອອກ ພ້ອມກັບນວດຜົມ ແລະ ໜັງຫົວໄປພ້ອມກັນ, ຫຼັງຈາກນັ້ນຈຶ່ງໃຊ້ນ້ຳລ້າງອອກໃຫ້ສະອາດອີີກເທື່ຶອໜຶ່ງ ຫາກປະຕິບັດຕາມນີ້ປະມານ 1-2 ຄັ້ງ ຈະຊ່ວຍບຳລຸງເສັ້ນຜົມໃຫ້ແຂງແຮງ ແລະ ມີນ້ຳໜັກ. ສຳລັບການນວດແມ່ນໃຫ້ນຳມານວດຜົມແລ້ວປະໄວ້ປະມານ 10 ນາທີ ແລ້ວຈຶ່ງລ້າງອອກດ້ວຍນ້ຳສະອາດ.
ໃຊ້ບຳລຸງຜິວໜ້າ
ຫຼັງຈາກທີ່ກຽມນ້ຳມ່າເຂົ້າແລ້ວແມ່ນໃຫ້ໃຊ້ສຳລີຈຸ່ມລົງນ້ຳມ່າເຂົ້າແລ້ວນຳມາເຊັດໃຫ້ທົ່ວໃບໜ້າ ຫຼັງຈາກນັ້ນໃຊ້ເຈ້ຍອານາໄມທີ່ຂ້ອນຂ້າງໜາ (ທີດຊູ່) ມາຕິດໃສ່ໃບໜ້າໃຫ້ທົ່ວແລ້ວປະໄວ້ປະມານ 20 ນາທີ ຈຶ່ງລ້າງອອກດ້ວຍນ້ຳສະອາດ ວິທີນີ້ຈະຊ່ວຍໃຫ້ຜິວໜ້າອ່ອນນຸ້ມຂຶ້ນ.
ໃຊ້ບຳລຸງຜິວມື
ວິທີນີ້ພຽງແຕ່ນຳເອົານ້ຳມ່າເຂົ້າມາບັນຈຸໃນພາຊະນະທີ່ເໝາະສົມ ແລ້ວເອົາມືແຊ່ປະມານ 10 ນາທີ, ຫາກເຮັດເປັນປະຈຳຈະຊ່ວຍໃຫ້ມືອ່ອນນຸ້ມ ແລະ ຂາວໃສຂຶ້ນ.
ໃຊ້ບຳລຸງຕົ້ນໄມ້ໃຫ້ຈະເລີນເຕີບໂຕ
ໃນນ້ຳມ່າເຂົ້າຈະມີສານອາຫານເປັນຈຳນວນຫຼາຍ ຫາກເຮົານຳໄປຫົດຕົ້ນໄມ້ເປັນປະຈຳກໍຈະຊ່ວຍໃຫ້ໃບ ແລະ ດອກ ຂອງມັນສາມາດຈະເລີນເຕີບໂຕງອກງາມໄດ້ໄວຂຶ້ນ ແລະ ອີກວິທີໜຶ່ງຄືການນຳເອົານ້ຳມ່າເຂົ້າໄປເຮັດເປັນນ້ຳໝັກຊີວະພາບເພື່ອບຳລຸງພືດໄດ້.
ໃຊ້ລ້າງຖ້ວຍ
ເຮົາສາມາດນຳເອົານ້ຳມ່າເຂົ້າໄປລ້າງພາຊະນະຕ່າງໆບໍ່ວ່າຈະເປັນຖ້ວຍ, ບ່ວງ, ຈານ ແລະ ອື່ນໆໄດ້ ມັນຈະຊ່ວຍກຳຈັດໄຂມັນ ແລະ ກິ່ນຄາວໃຫ້ໝົດໄປໄດ້.
ໃຊ້ຊັກຜ້າຂາວ
ເຮົາສາມາດນຳໃຊ້ນ້ຳມ່າເຂົ້າມາຊ່ວຍເຮັດໃຫ້ກັບມາຂາວອີກເທື່ອໜຶ່ງດ້ວຍການນຳຜ້າທີ່ຕ້ອງການຊັກມາແຊ່ໃນນ້ຳມ່າເຂົ້າປະມານ 3-5 ມື້ ໂດຍການປ່ຽນນ້ຳມ່າເຂົ້າທຸກໆມື້ ຫຼັງຈາກນັັ້ນໃຫ້ນຳເຄື່ອງໄປຊັກປົກກະຕິ ວິທີນີ້ຈະຊ່ວຍໃຫ້ຜ້າຂາວຂຶ້ນ.