ວິທີເຮັດກ້ອນແຮ່ທາດ
ສະພາບທົ່ວໄປ
ແຫຼ່ງອາຫານທີ່ສໍາຄັນສໍາລັບລ້ຽງງົວຄວາຍແມ່ນທົ່ງຫຍ້າທໍາມະຊາດ ແລະ ເຟືອງ, ໂດຍສະເພາະໃນລະດູແລ້ງ ອາຫານຕົ້ນຕໍຂອງງົວ-ຄວາຍຈະມີແຕ່ໃບໄມ້, ຫຍ້າແກ່, ຫຍ້າແຫ້ງ ແລະ ເຟືອງແຫ້ງ, ເຊິ່ງອາຫານເຫຼົ່ານີ້ເປັນອາຫານທີ່ມີຄຸນນະພາບຕໍ່າ ເມື່ອສັດກິນເຂົ້າໄປກໍ່ບໍ່ສາມາດຍ່ອຍອາຫານເຫຼົ່ານັ້ນໄດ້ດີ ແລະ ບໍ່ສາມາດຕອບສະໜອງພະລັງງານ ແລະ ທາດຊີ້ນໃຫ້ພຽງພໍໄດ້ ເຊິ່ງເປັນສາເຫດເຮັດໃຫ້ສັດຈ່ອຍ, ນ້ຳໜັກຫຼຸດລົງ ແລະ ສັດທີ່ໃຊ້ເປັນແຮງງານລາກແກ່ກໍ່ມີສະພາບຮ່າງກາຍບໍ່ສົມບູນ ແລະ ບໍ່ພ້ອມສໍາລັບການອອກແຮງງານໃນລະດູການຜະລິດ.
ກ້ອນແຮ່ທາດອາຫານເສີມແມ່ນການລວບລວມເອົາສ່ວນປະກອບຕ່າງໆທີ່ມີຄຸນຄ່າທາງດ້ານອາຫານສໍາລັບສັດລ້ຽງ, ເພື່ອມາປະກອບເຂົ້າກັນເຮັດເປັນກ້ອນ ແລະ ນໍາໄປໃຫ້ສັດກິນ ເຊິ່ງກ້ອນແຮ່ທາດອາຫານເສີມສາມາດຊ່ວຍໃຫ້ສັດຍ່ອຍອາຫານໄດ້ດີຂຶ້ນ, ເຮັດໃຫ້ສັດສາມາດນໍາໃຊ້ອາຫານທີ່ມີຄຸນນະພາບຕໍ່າ ເຊັ່ນ: ຫຍ້າແຫ້ງ, ຫຍ້າແກ່, ເຟືອງ ແລະ ອື່ນໆມາເປັນປະໂຫຍດໄດ້ດີຂຶ້ນ.
ວິທີເຮັດ
ສ່ວນປະກອບທີ່ສໍາຄັນໃນການຜະລິດກ້ອນແຮ່ທາດອາຫານເສີມມີ: ຮໍາ, ປຸຍຢູເຣຍ, ເກືອ, ກະດູກປົ່ນ, ກາກນ້ຳຕານ, ປູນຂາວ, ຊີເມັນ ແລະ ດິນດາກ.
ອຸປະກອນຮັບໃຊ້ການຜະລິດ: ອ່າງສໍາລັບປະສົມ, ຈົກ, ຊວ້ານ, ຊິງຊັ່ງນ້ຳໜັກ ແລະ ໄມ້ແບບ.
ສູດປະສົມກ້ອນແຮ່ທາດອາຫານເສີມ
ວັດຖຸດິບ |
|
|
ຄິດເປັນເປີເຊັນ |
|
|
|
ສູດ1 |
ສູດ2 |
ສູດ3 |
ສູດ4 |
ສູດ5 |
ຮຳ |
40 |
30 |
45 |
40 |
50 |
ກາກນ້ຳຕານ |
5 |
10 |
0 |
0 |
0 |
ປູຍຢູເຣຍ |
10 |
10 |
10 |
10 |
10 |
ເກືອ |
5 |
5 |
5 |
5 |
5 |
ກະດູກປົ່ນ |
5 |
10 |
5 |
10 |
0 |
ປູນຂາວ |
10 |
10 |
10 |
10 |
10 |
ຊີເມັນ |
10 |
10 |
10 |
10 |
10 |
ດິນດາກ |
20 |
20 |
20 |
20 |
20 |
ລວມ |
100 |
100 |
100 |
100 |
100 |
ນ້ຳ(ລິດ) |
15-25 |
15-25 |
20-35 |
20-35 |
20-35 |
ໃນການຜະລິດກ້ອນແຮ່ທາດອາຫານເສີມ ຊາວກະສິກອນສາມາດຜະລິດໃຊ້ເອງ, ຊຶ່ງມີຂັ້ນຕອນການຜະລິດແບບງ່າຍໆດັ່ງນີ້:
- ລະລາຍປຸຍຢູເຣຍ ແລະ ເກືອຕາມອັດຕາມສ່ວນທີ່ກໍານົດໄວ້.
- ຫຼັງຈາກນັ້ນໃຊ້ນ້ຳທີ່ໄດ້ຈາກຂໍ້ 1 ມາປະສົມ ກັບກາກນໍ້າຕານ.
- ປະສົມສ່ວນທີ່ມີປະລິມານໜ້ອຍ (ກະດູກປົ່ນ, ປູນຂາວ ແລະ ຊີເມັນ) ໃຫ້ເຂົ້າກັນດີ.
- ປະສົມສ່ວນທີ່ມີຈໍານວນຫຼາຍ (ດິນດາກ ແລະ ຮໍາ) ໃຫ້ເຂົ້າກັນດີ.
- ຫຼັງຈາກນັ້ນນໍາສ່ວນປະສົມຈາກຂໍ້ 4 ແລະ 3 ມາປະສົມໃຫ້ເຂົ້າກັນດີ.
- ຈາກນັ້ນນໍາສ່ວນປະສົມຂໍ້ທີ່ 2 ມາໃສ່ສ່ວນປະສົມຂໍ້ 5 ແລ້ວຄົນໃຫ້ເຂົ້າກັນດີ.
- ແລ້ວນໍາມາໃສ່ແບບທີ່ກຽມໄວ້ ອາດຈະເປັນຮູບສີ່ລ່ຽມ ຫຼື ເປັນຮູບອື່ນໆກໍ່ໄດ້ (ຕາມຄວາມເຫມາະສົມ) ແລ້ວອັດໃຫ້ແຫນ້ນ.
- ເມື່ອຖອດແບບອອກ ແລ້ວປະກ້ອນແຮ່ທາດໄວ້ໃນບ່ອນຮົ່ມໃຫ້ແຫ້ງດີ (ປະມານ 1 ຫາ 2 ອາທິດ) ຈຶ່ງນໍາມາໃຫ້ສັດເລຍກິນ.
ການນໍາໄປໃຫ້ສັດກິນ:
ໃນກ້ອນແຮ່ທາດອາຫານເສີມ ມີປູຍຢູເຣຍປະກອບຢູ່ 10% ເພາະສະນັ້ນການເຮັດໃຫ້ສັດລຶ້ງເຄີຍກັບການກິນຢູເຣຍ ຈຶ່ງມີຄວາມຈໍາເປັນ. ໃນໄລຍະທຳອິດຄວນໃຫ້ສັດເລຍມື້ຫນຶ່ງປະມານ 1-2 ຊົ່ວໂມງ ຕິດຕໍ່ກັນເປັນໄລຍະ 10 ມື້ ຫຼັງຈາກນັ້ນຈຶ່ງປ່ອຍໃຫ້ສັດເລຍຕາມໃຈ.
ການໃຊ້ກ້ອນແຮ່ທາດອາຫານເສີມແມ່ນເປັນການເສີມອາຫານໃຫ້ແກ່ສັດ ຫຼັງຈາກທີ່ໄດ້ຮັບອາຫານຫຍາບ ທີ່ມີຄຸນນະພາບຕໍ່າເຊັ່ນ: ເຟືອງ, ອາຫານທີ່ໄດ້ຈາກທົ່ງນາ, ທົ່ງຫຍ້າທໍາມະຊາດ ແລະ ຕົ້ນໄມ້ທີ່ເປັນອາຫານສັດ, ດັ່ງນັ້ນໃນການໃຊ້ກ້ອນແຮ່ທາດອາຫານເສີມບໍ່ຄວນໃຫ້ສັດທີ່ຫີວກິນ ເພາະມັນຈະກິນຫຼາຍໂພດຈົນເຮັດໃຫ້ໄດ້ຈໍານວນຢູເຣຍຫຼາຍເກີນຄວາມຕ້ອງການເຊິ່ງຈະເປັນອັນຕະລາຍແກ່ສັດໄດ້.
ຈາກການສັງເກດໃນການໃຊ້ກ້ອນແຮ່ທາດອາຫານເສີມໃຫ້ແກ່ສັດ ໂດຍສະເລ່ຍແລ້ວສັດຈະກິນໄດ້ປະມານ 200-300 ກຣາມ/ວັນ. ຖ້າຜະລິດກ້ອນແຮ່ທາດນ້ໍາຫນັກ 10 ກິໂລກຣາມ ຈະກຸ້ມ 1 ເດືອນ.
ຂໍ້ມູນຈາກ: ສູນຄວບຄຸມມາດຕະຖານການລ້ຽງສັດ ແລະ ການປະມົງ