ຕົ້ນຊໍ້ / Gamari

ຕົ້ນຊໍ້ຈັດເປັນໄມ້ຢືນຕົ້ນຂະໜາດກາງ, ສູງ 15-25 ມ, ກິ່ງອ່ອນລັກສະນະເປັນສັນສີ່ຫຼ່ຽມ ແລະ ມີຂົນລະອຽດ. ໃບດ່ຽວ, ຈັບລຽງກົງກັນຂ້າມສະຫຼັບຕັ້ງສາກ, ລັກສະນະຂອງໃບເປັນຮູບໄຂ່ ຫຼື ຮູບຫົວໃຈ, ປາຍໃບແຫຼມ ຫຼື ແຫຼມຍາວ,ກວ້າງ 10-15 ຊມ ແລະ ຍາວ 20-25 ຊມ, ແຜ່ນໃບດ້ານໜ້າກ້ຽງ, ສ່ວນດ້ານລຸ່ມໃບມີນວນ ແລະ ມີຂົນສັ້ນນຸ່ມ. ອອກດອກເປັນຊໍ່ກະຈຸກແຕກກແໜງສັ້ນໆ, ໂດຍອອກຕາມປາຍກິ່ງ, ມີ 1 ຊໍ່ ຫຼື ຫຼາຍຊໍ່, ຍາວປະມານ 7-15 ຊມ, ຊໍ່ດອກມີຍ່ອຍຈໍານວນຫຼາຍ, ດອກມີໃບປະດັບແຕ່ຫຼົ່ນງ່າຍ, ກີບດອກມີ 5 ກີບ, ປາຍກີບເປັນຮູບສາມຫຼ່ຽມຂະໜາດນ້ອຍ, ສ່ວນກີບດອກເປັນຮູບລຳໂພງດ້ານດຽວ, ປາຍແຍກອອກເປັນ 5 ກີບແບ່ງເປັນກີບເທິງ 2 ກີບ ແລະ ກີບລຸ່ມ 3 ກີບ ຂະໜາດບໍ່ເທົ່າກັນ, ດ້ານນອກເປັນສີນໍ້າຕານແດງ, ສ່ວນດ້ານໃນຫຼອດກີບເປັນສີຄີມອ່ອນໆ, ກີບປາກລຸ່ມ ກີບກາງດ້ານໃນເປັນສີເຫຼືອງແຊມ. ໝາກເປັນໝາກສົດ ລັກສະນະຂອງໝາກເປັນຮູບວົງຮີ ຫຼື ຮູບໄຂ່, ຍາວ 1.5-2 ຊມ, ຜິວໝາກກ້ຽງເປັນມັນ, ມີກິ່ນ, ໝາກອ່ອນເປັນສີຂຽວ, ເມື່ອສຸກແລ້ວຈະປ່ຽນເປັນສີເຫຼືອງ, ໝາກເປັນແບບມີແກ່ນດຽວ, ບາງເທື່ອມີ 2 ແກ່ນ.