ໝາກແໜ່ງຂຽວປ່າ / Wild Cardamom

ເກິດເປັນເຫງົ້າເລືອ, ລຳຕົ້ນສູງ 2–3 ມ, ເຫງົ້າໜາ 0.7–1.5 ຊມ, ສີຂົນອົມສີນ້ຳຕານ ຫຼື ສີຂຽວ. ລຳຕົ້ນມີໃບປະມານ 30–40 ໃບຕໍ່ຕົ້ນ. ແຜ່ນໃບຂອບຂະໜານ, ຂະໜາດ 10–45 x 1–9 ຊມ, ກ້ຽງ, ໂຄນຫຼີ້ມ, ປາຍຮຽວແຫຼມ, ເສັ້ນກ່າງກາງໃບນູນທາງດ້ານທ້ອງ, ເສັ້ນໃບຂະແໜງເຫັນເປັນເງົາ. ຊໍ່ດອກເກິດຈາກເຫງົ້າໃກ້ກັບກົກ, ຍາວປະມານ 5–15 ຊມ, ມີດອກ 1–3 ຊໍ່ຕໍ່ຕົ້ນ, ພວງດອກຮູບໄຂ່ ເຖີງ ຮູບຮີ, ຂະໜາດ 3–4 x 1.5–3 ຊມ, ມີດອກປະມານ 1–2(–4) ດອກບານພ້ອມກັນ. ພວງໝາກມີກ້ານຍາວ 2–4 ຊມ, ໜາ 0.3 ຊມ, ສີນ້ຳຕານ, ກ້ຽງບໍລິເວນໂຄນ, ມີຂົນສ່ວນປາຍ, ພວງໝາກມີໝາກໜ້ອຍ ຂະໜາດ 2–6 x 3 ຊມ, ມີກ້ານໝາກສັ້ນໆ ຍາວປະມານ 3 ມມ, ມີຂົນ, ໝາກກົມ ເຖີງຮູບໄຂ່, ຂະໜາດ 0.5–1.5 ຊມ, ມີຂົນ ແລະ ໜາມ, ສີຂຽວອົມແດງ, ສີບົວອົມສີແດງ, ຫຼື ສີແດງປົນສີນ້ຳຕານ, ໜາມແປກົກ, ມີຂົນ. ໝາກມົນກົກຂະໜາດ 2–3 ຊມ, ສີນ້ຳຕານດຳ, ກ້ຽງ, ເຍື້ອຫຸ່ມເມັດສີນ້ຳຕານຈາງ ມີ 15 ເມັດຕໍ່ຫ້ອງ.

ໝາຍເຫດ: ໝາກແໜ່ງປ່າໃນປະເທດລາວມີ ສອງຊະນິດຄື: Wurfbainia villosa ແລະ Wurfbainia uliginosa, ແຕ່ມີຄວາມແຕກຕ່າງກັນຄື ຊະນິດ W. uliginosa ກິບປາກມີຕີ່ງແຕກອອກທັ້ງສອງຂ້າງປະມານ 1 ຊມ, ແຕ່ W. villosa ບໍ່ມີຕີ່ງ. ໝາກແໜ່ງຊະນິດນີ້ມີລັກສະນະຂອງຕົ້ນ ແລະ ໝາກຄ້າຍຄືກັບໝາກແໜ່ງຊະນິດ Wurfbainia villosa ແລະ ສ່ວນໂດຍທົ່ວໄປເອື້ນໝາກແໜ່ງຂຽວ, ແຕ່ໝາກແໜ່ງຊະນີດນີ້ພົບເຫັນສະເພາະພາກກາງຂອງລາວເທົ່ານັ້ນ.