ລຳຕົ້ນຂະໜາດກາງ, ສູງ 5-15 ມ, ກິ່ງອ່ອນ, ໃບອ່ອນ ແລະ ຊໍ່ດອກມີຂົນອ່ອນນຸ້ມປົກຄຸມຢ່າງໜາແໜ້ນ, ຊົງຟຸ່ມກົມ ແລະ ສູງ. ໃບດ່ຽວ, ອອກວຽນສະຫຼັບ, ຮູບໄຂ່ປີ້ນ ຫຼື ຮູບບ່ວງ, ກວ້າງ 2-3.5 ຊມ, ຍາວ 4-8 ຊມ, ໂຄນໃບແຫຼມ ຫຼື ມົນ, ຂອບລຽບ, ປາຍມົນ ຫຼື ວ້ຳຕື້ນ, ຜິວໃບດ້ານເທິງສີຂຽວເຂັ້ມ, ມີຂົນສັ້ນກະຈາຍບໍລິເວນເສັ້ນກາງໃບ. ກ້ານໃບຍາວ 3-5 ມມ. ຊໍ່ດອກແບບກະຈະ, ອອກຕາມງ່າມໃບ, ຍາວ 5-10 ຊມ. ດອກຍ່ອຍມີຈຳນວນຫຼາຍ, ຂະໜາດນ້ອຍ, ສີຂາວອົມຂຽວ. ກາບດອກມີ 5 ກາບ, ຮູບຫຼິ່ມ, ປາຍແຫຼມ, ມີຂົນກະຈາຍຢູ່ທົ່ວ. ກີບດອກມີ 5-6 ກີບ, ຍາວ 2-3 ມມ, ສີຂາວ ຫຼື ສີເຫຼືອງອ່ອນ. ເກສອນເພດຜູ້ມີ 10 ອັນ, ບໍ່ສະເໝີກັນ, ກ້ານຊູຖົງລະອອງຍາວ 1-2 ມມ, ຖົງລະອອງຮູບຮີ, ຍາວ 0.8-1 ມມ. ເຕົ້າໄຂ່ຈັບເທິງ, ຮູບກົມ, ປາຍຮວງຮັບມົນ. ໝາກຂ້ອນຂ້າງກົມ, ຮູບຮີ ຫຼື ຮູບຫົວໃຈບ້ຽວ, ກວ້າງປະມານ 1.5 ຊມ, ຍາວປະມານ 1 ຊມ, ປາຍຕັດ, ເປືອກມີຂົນເລັກນ້ອຍ ຫຼື ກ້ຽງ. ແກ່ນຮູບກົມ, ຂະໜາດ 6-8 ມມ, ສີນ້ຳຕານອ່ອນ.