ລັກສະນະທົ່ວໄປຂອງຫອຍໂອກ ເປືອກມີລັກສະນະໂພງກົມເປັນກຽວ, ຊ່ອງປາກຂອງເປືອກກວ້າງ, ມີຝາປິດຄັກແນ່, ຕິນແປ  ແລະ ກວ້າງ, ໂຕຫອຍຈະມີຈະງອຍປາກແບ່ງເປັນສອງຮິມ, ແຕ່ລະຮີມຈະມີໜວດຮຽວ ແລະ ຍາວຫຼາຍ, ຕາຢູ່ທີ່ບໍລິເວັນກົກໜວດ, ຫາຍໃຈດ້ວຍຟັນຟືມ, ເຊິ່ງຢູ່ໃນຊ່ອງໃຫຍ່ພາຍໃນເປືອກກັນໄວ້. ເປືອກເປັນສີຂຽວ, ເປືອກກວ້າງເຖິງ 5 ຊັງຕິແມັດ, ເຊິ່ງຫອຍໂອກຢູ່ໄດ້ທັງໃນນ້ຳ ແລະ ບົກບ່ອນຊຸ່ມຊື່ນ ທີ່ເປັນດິນປົນຊາຍ ແລະ ຕາມຊອກຕາມໂພງແຄມໜອງ. ອາຫານຂອງພວກມັນໄດ້ແກ່ພືດ, ຮາກພືດ, ໃບໄມ້ ແລະ ກິ່ງງ່າໄມ້ໃນນ້ຳ.
ສຳລັບຫອຍໂອກ ຮູບຊົງຈະກົມປ້ອມ ແລະ ຍອດກົ້ນເປືອກສັ້ນ ຫຼື ເກືອບແປ, ເປືອກຈະມັກເປັນສີຂຽວປົນສີນ້ຳຕານ ເປັນສີລ້ວນທັ້ງເປືອກ ຫຼື ເປັນລາຍສີເຫຼືອງ, ຂອບປາກຈະບາງເປືອກດ້ານໃນຂອງຂອບປາກຈະມີສີຂາວ ຫຼື ສີເຫຼືອງປົນສີສົ້ມ, ປາກບໍລິເວັນຝາປິດຄ້າຍຮູບໝາກມ່ວງ ແລະ ກຽວມີປະມານ 3 ຮອບກຽວ.