ຈັດເປັນໄມ້ລົ້ມລຸກອາຍຸຫຼາຍປີ, ເກີດເປັນຟຸ່ມ. ລຳຕົ້ນມີທັງລຳຕົ້ນຕັ້ງຊື່ ແລະ ລຳເລືອ, ມີເຫງົ້າ ຫຼື ຫົວໃຕ້ດິນສາມາດແຕກໜໍ່ໄດ້, ລຳຕົ້ນຮູບກົມ, ມີປ້ອງ, ມີຂໍ້, ສູງ 1-2 ມ. ໃບດ່ຽວ, ອອກຕາມຂໍ້, ຮູບໄຂ່ ຫຼື ຮູບຮີ, ກ້ວາງ 10-20​ ຊມ, ຍາວ 20-35 ຊມ, ໂຄນໃບມົນ, ຂອບລຽບ, ປາຍແຫຼມ, ແຜ່ນໃບສີຂຽວ, ຜິວລຽບທັງສອງດ້ານ, ມັກມີລວດລາຍ ແລະ ສີສັນງາມຕາມແຜ່ນໃບ, ໃບຈະບານອອກໃນຊ່ວງກາງຄືືນ ແລະ ມ້ວຍເຂົ້າຫາກັນໃນຕອນສວຍ. ກ້ານໃບແຜ່ອວບຫຸ້ມລຳຕົ້ນໄວ, ຍາວ 10-20 ຊມ. ຊໍ່ດອກແບບແບບແຕກແໜ່ງ ຫຼື ຊໍ່ດອກແບບກະຈຸກສັ້ນ, ອອກຢູ່ບໍລິເວນປາຍຍອດ. ດອກຍ່ອຍອອກເປັນຄູ່ຈາກກາບຮອງດອກ ຫຼື ອອກຮຽງສະຫຼັບຈາກກ້ານຊໍ່ດອກ, ສີຂາວ. ກາບດອກ ແລະ ກີບດອກມີ 3 ກີບ. ເກສອນເພດຜູ້ຈຳນວນຫຼາຍ. ດອກສົມບູນເພດມີ 1 ດອກ, ສ່ວນທີ່ເຫຼືອເປັນໝັນ, ກາບດອກມີ 3 ກາບ. ກີບດອກໂຄນເຊື່ອມຕິດກັນເປັນຫຼອດ, ປາຍແຍກອອກເປັນ 3 ກີບ. ໝາກຮູບກົມແບ່ງອອກເປັນ 3 ຫ້ອງ, ມີຂະໜາດ 1,5-2 ຊມ, ໝາກອ່ອນເປັນສີຂຽວ, ໝາກແກ່ເປັນສີເຫຼືອງ. ແກ່ນມີ 1-3 ຊມ, ໝາກແຫ້ງບໍ່ແຕກ, ເນື້ອນຸ້ມ.