ປາບູ່ / Marble Goby

       ປາບູ່ເປັນປາທີ່ມີເກັດ, ລຳໂຕມີຮູບຮ່າງຊົງກະບອກ, ມີຫົວຂະໜາດໃຫຍ່ກວ່າລຳໂຕ, ປາກຂະໜາດໃຫຍ່, ຮິມຝີປາກຍາວເຮັດໃຫ້ສາມາດອ້າໄດ້ກວ້າງ, ພາຍໃນປາກຄາງກະໄຕເທິງມີແຂ້ວຂະໜາດນ້ອຍຂ້ອນຂ້າງຍາວຈຳນວນຫຼາຍ. ຕາ 1 ຄູ່ຈັບຢູ່ຂ້ອນໄປທາງຂ້າງ, ໂນນອອກເລກນ້ອຍ. ລຳໂຕມີລັກສະນະກົມ ແລະ ແປດ້ານຂ້າງເລັກນ້ອຍ, ໂດຍທົ່ວໄປມີຂະໜາດ 20-30 ຊມ ແລະ ເມື່ອມີອາຍຸເພີ່ມຂຶ້ນລຳໂຕສາມາດຍາວໄດ້ຮອດ 70 ຊມ. ເກັດເປັເກັດລະອຽດ ມີຂະໜາດນ້ອຍທົ່ວລຳໂຕ, ມີສີແຕກຕ່າງກັນຕັ້ງແຕ່ ສີນ້ຳຕານ, ສີນ້ຳຕານອົມແດງ ແລະ ສີນ້ຳຕານເຂັ້ມ ຫຼື ອອກດຳ, ເຊິ່ງກະຈາຍເປັນແຖບລາຍທົ່ວລຳໂຕ ໂດຍທີ່ໂຄນຫາງມີແຖບລາຍເປັນຮູບໂຕວີ, ໜ້າທ້ອງມີສີຂາວ ຫຼື ສີຈາງ, ເກັດຂອງປາບູ່ມີຢູ່ 2 ເກັດຄື: ເກັດກົມ ແລະ ລຽບ  ເຊິ່ງຈະພົບໄດ້ບໍລິເວນລຳໂຕ ແລະ ເກັດແຫຼມ, ຂອບເປັນໜາມເຊິ່ງຈະພົບຢູ່ບໍລິເວນລຳໂຕ. ຄີຫຼັງມີ 2 ຕອນແຍກກັນຢ່າງຊັດເຈນ ໂດຍຄີຫຼັງສ່ວນທຳອິດຢູ່ບໍລິເວນສັນຫຼັງບໍລິເວນລຳໂຕ, ມີກ້ານຄີທັງໝົດ 7 ກ້ານ, ຄີຫຼັ້ງສ່ວນທີ່ສອງຈັບຢູ່ລຳໂຕດ້ານເທິງຂ້ອນໄປທາງຫາງ, ມີກ້ານຄີ 11 ອັນ ເຊິ່ງມີຂະໜາດໃຫຍ່ ແລະ ຍາວກວ່າສ່ວນທຳອິດ. ຄີເອິກ ຫຼື ຄີຫູມີຂະໜາດໃຫຍ່, ມີກ້ານຄີ 15 ອັນ ຢູ່ຖັດຈາກເຫງືອກມາເລັກນ້ອຍ. ຄີທ້ອງຢູ່ດ້ານລຸ່ມຂອງຄີເອິກ. ຄີກົ້ນຈັບຢູ່ດ້ານລຸ່ມຂອງລຳໂຕບໍລິເວນສ່ວນຫາງ ກົງກັບຂ້າມກັບຄີຫຼັງສ່ວນທີ່ 2, ມີກ້ານຄີ 7 ກ້ານ ແລະ ຄີຫາງມີກ້ານຕີ 15-16 ກ້ານ, ມີລັກສະນະມົນ ແລະ ມີແຖບສີເຂັ້ມ 3-5 ແຖບ.
     ແຫຼ່ງອາໄສ: ພົບໄດ້ທັງແຫຼ່ງນ້ຳໄຫຼ ແລະ ພົບໄດ້ທົ່ວໄປໃນແຫຼ່ງນ້ຳນິ້ງ, ບຶງ, ບໍ່ ແລະ ແຫຼ່ງນ້ຳຂະໜາດນ້ອຍ, ມັກອາໄສຢູ່ແບບນິ້ງໆຢູ່ຕາມພື້ນນ້ຳ, ມັກອາໄສ ແລະ ຫາກິນຕາມແຄມຝັ່ງທີ່ມີໂຫງນຫີນ ຫຼື ຕໍໄມ້, ກາງວັນມັກຫຼົບຊ້ອນໂຕ ສ່ວນກາງຄືນຈະອອກຫາກິນ
     ນິໄສ: ເປັນສັດທີ່ມັກຄວາມສະງົບ, ບໍ່ມັກຢູ່ຮ່ວມກັບຝູງ.
    ອາຫານ: ເປັນປາກິນຊີ້ນ ຊອກຫາກິນໃນຍາມກາງຄືນ ມັກຈະລອຍນິ້ງໆ ແລະ ຫຼົບລີ້ເພື່ອຖ້າງັບເຫຍື່ອທີ່ລອຍຜ່ານມາຕາມຫວ່າງຫີນ, ໂພງໄມ້ ຫຼື ພືດນ້ໍາ, ອາຫານຫຼັກຂອງພວກມັນໄດ້ແກ່ລູກປາ ລື ປາຂະໜາດນ້ອຍ, ກຸ້ງ ແລະ ປູເປັນຕົ້ນ.