ຕົ້ນນຽມ / Ming Aralia

ຕົ້ນນຽມຈັດເປັນໄມ້ຟຸ່ມຂະໜາດນ້ອຍ. ລຳຕົ້ນຕັ້ງຊື່, ສູງປະມານ 1-2 ມ, ພາກສ່ວນອ່ອນເປັນສີຂຽວ, ພາກສ່ວນແກ່ເປັນສີເທົາ. ໃບປະສົມຂັ້ນສາມແບບຂົນນົກປາຍຄີກ, ອອກຮຽງສະຫຼັບ. ໃບຍ່ອຍຈັບກົງກັນຂ້າມກັນ, ຈຳນວນ 5-9 ຄູ່, ຮູບຮີ ຫຼື ຮູບຫອກ, ກ້ວາງ 1-2 ຊມ, ຍາວ 3-5 ຊມ, ໂຄນໃບບ້ຽວ, ຂອບແສກແຂ້ວເລື່ອຍ ຫຼື ເປັນວັກເລິກຄ້າຍກົງເລີ່ອຍ, ປາຍແຫຼມ, ແຜ່ນໃບໜາຄ້າຍຄືໜັງ, ຜິວໃບດ້ານເທິງສີຂຽວເຂັ້ມ, ຜິວໃບດ້ານລຸ່ມສີຂຽວອ່ອນ, ຜິວລຽບທັງສອງດ້ານ. ກ້ານໃບກົມ, ຍາວ 5-7 ຊມ, ສີຂຽວ ຫຼື ສີແດງອົມຂຽວ. ຊໍ່ດອກລວມມີຂະນາດໃຫຍ່, ຍາວ 10-17 ຊມ, ອອກຕາມປາຍກິ່ງ ຫຼື ປາຍຍອດ. ຊໍ່ດອກຍ່ອຍແບບຮູບດິ້ວຄັນຮົ່ມ. ດອກຍ່ອຍຈັບແບບກະຈຸກ, ມີຈຳນວນ 20-40 ດອກ, ດອກສົມບູມເພດ. ກີບດອກມີ 5 ກີບ, ຮູບຮີ ຫຼື ຮູບຂອບຂະໜານ, ກ້ວາງ 0,4-0,7 ຊມ, ຍາວ 1-2 ຊມ, ຂອບລຽບ, ປາຍແຫຼມ, ສີຂຽວປົນສີບົວ. ເກສອນເພດຜູ້ມີ 5 ອັນ, ກ້ານຊູຖົງລະອອງຍາວ 2-3 ມມ, ຖົງລະອອງຈັບປາຍ, ຮູບໝາກໄຂ່ຫຼັງ, ສີຂາວ. ເຕົ້າໄຂ່ຈັບລຸ່ມ, ຮູບກົມ, ຮວງຮັບມີຂະໜາດສັ້ນ. ໝາກກົມ, ໝາກອ່ອນສີຂຽວ, ໝາກແກ່ສີນ້ຳຕານ. ແກ່ນຮູບກົມ, ສີດຳ.