ຕົ້ນຟອງສະມຸດ / Marvel of peru
APA 6th ed. ຕົ້ນຟອງສະມຸດ / Marvel of peru. (2019, August 8). Retrieved from https://www.phakhaolao.la/kb/0000636
MLA 8th ed. ຕົ້ນຟອງສະມຸດ / Marvel of peru. Pha Khao Lao, 8 August 2019, https://www.phakhaolao.la/kb/0000636.
Chicago 17th ed. Pha Khao Lao. 2019. "ຕົ້ນຟອງສະມຸດ / Marvel of peru." Published August 8, 2019. https://www.phakhaolao.la/kb/0000636.
Mirabilis jalapa var. jalapa
Mirabilis jalapa subsp. lindheimeri Standl.
Mirabilis jalapa var. lindheimeri (Standl.) Cory
Mirabilis lindheimeri (Standl.) Shinners
Nyctago hortensis Dum.Cours.
Nyctago jalapae (L.) DC.
Nyctago versicolor Salisb.
Eng: Marvel of peru, Four o’clock, False Jalap
ຕົ້ນຟອງສະມຸດຈັດເປັນໄມ້ພຸ່ມເນື້ອອ່ອນມີອາຍຸຫຼາຍປີ, ມີເຫງົ້າ ຫຼື ຫົວຢູ່ໃຕ້ດິນ, ລໍາຕົ້ນສູງ 1-1.5 ມ, ສີແດງອອກນວນເລັກນ້ອຍ, ແຕກກິ່ງກ້ານຫຼາຍ, ເປັນຊົງພຸ່ມແຜ່ກວ້າງ, ຂະຫຍາຍພັນດ້ວຍວິທີເພາະແກ່ນ, ຄວນປູກໄວ້ກາງແຈ້ງ ແລະ ດິນທີ່ປູກຄວນເປັນດິນລ້ວນ. ຮາກຟອງສະມຸດເປັນຫົວ ຫຼື ເອີ້ນວ່າເຫງົ້າ, ມີຂະໜາດເສັ້ນຜ່າສູນກາງປະມານ 10 ຊມ. ໃບອອກເປັນໃບຄູ່ໆ, ສະຫຼັບກັນໄປຕາມຕົ້ນ, ໃບມີລັກສະນະເປັນຮູບໄຂ່ ຫຼື ຮູບໃບຫອກ ຫຼື ຮູບສາມຫຼ່ຽມ, ໃບມີຄວາມກວ້າງ 2-9 ຊມ ແລະ ຍາວ 5-15 ຊມ ປາຍແຫຼມ, ສ່ວນກົກໃບຕັດເປັນຮູບຫົວໃຈ. ດອກມີກິ່ນຫອມ, ອອກດອກຕິດກັນເປັນກຸ່ມໆ, ລັກສະນະຂອງດອກທີ່ຍັງບໍ່ບານເປັນຮູບຫຼອດ ເມື່ອບານແລ້ວຈະປ່ຽນເປັນຮູບລຳໂພງ, ປາຍແຍກອອກເປັນ 5 ກີບ, ໂດຍດອກບານເຕັ້ມທີ່ຈະມີຂະໜາດເສັ້ນຜ່າສູນກາງປະມານ 3-5 ຊມ, ດອກມີກີບປະດັບຮູບລະຄັງຕິດຢູ່ຖານ, ຊໍ່ດອກມີ 4-5 ດອກ, ດອກຈະບານຕອນບາຍໄປຈົນຮອດຮອດຕອນເຊົ້າແລ້ວຈະຫຸບ. ໝາກ ຫຼື ແກ່ນ ມີລັກສະນະເປັນຊົງກົມ, ມີສີດໍາ, ມີຂະໜາດຍາວ 0.5-0.9 ຊມ, ເປືອກບາງ ມີສັນ 5 ສັນ, ພາຍໃນຈະມີແປ້ງຢູ່ຈໍານວນຫຼາຍ.
ປະໂຫຍດ:
- ຕົ້ນຟອງສະມຸດນິຍົມປູກເປັນໄມ້ປະດັບທົ່ວໄປ ໂດຍສະເພາະຕົ້ນທີ່ມີສີບົວ ແລະ ສີຂາວ.
- ແປ້ງຈາກແກ່ນໃຊ້ທາຮັກສາສິວ, ຝ້າ, ລົບຮອຍດ່າງດໍາເທິງໃບໜ້າ.
- ຜົງຈາກຮາກນໍາມາໃຊ້ປະສົມກັບແປ້ງເຂົ້າຈາວ ແລະ ຜົງໄມ້ຈັນ ນໍາມາໃຊ້ເຮັດເຄື່ອງສໍາອາງໄດ້.
- ດອກນິຍົມນໍາມາໃຊ້ເປັນສີປະສົມອາຫານ.
ສັບພະຄຸນ:
- ຫົວ ຫຼື ເຫງົ້າ ຊ່ວຍແກ້ໄຂ້ ລະງັບຄວາມຮ້ອນໃນຮ່າງກາຍ.
- ຫົວຕົ້ນຟອງສະມຸດໃຊ້ຮັບປະທານເປັນຢາຂັບເຫື່ອໄດ້.
- ນໍ້າຄັ້ນຈາກໃບໃຊ້ຊະລ້າງບາດແຜ ຫຼື ແຜຟົກຊໍ້າໃຫ້ດີໄວຂຶ້ນ.
- ໃບຊ່ວຍລົດອາການອັກເສບໄດ້.
ຂໍ້ຄວນລະວັງ:
- ແກ່ນຟອງສະມຸດສ່ວນໃຫຍ່ຈະມີຄວາມເປັນພິດຫຼາຍ (ສານ Neurotoxic) ບໍ່ຄວນຮັບປະທານ ຫາກໄດ້ຮັບພິດຈະເຮັດໃຫ້ເກີດອາການປວດຮາກ ແລະ ມີອາການຖອກທ້ອງ, ຖ້າຫາກໄດ້ຮັບພິດໃນປະລິມານຫຼາຍອາດຈະເຮັດໃຫ້ເສຍຊີວິດໄດ້.
- ບໍ່ຄວນໃຊ້ສະໝຸນໄພຟອງສະມຸດໃນແມ່ຍິງຖືພາ ເນື່ອງຈາກມີລາຍງານພົບວ່າມັນເຮັດໃຫ້ເກີດການແທ້ງລູກໄດ້.