ຕົ້ນກຸງ / Ton Koung

ເປັນໄມ້ຢືນຕົ້ນຂະໜາດໃຫຍ່. ລຳຕົ້ນສູງປະມານ 40 ມ, ເນື້ອໄມ້ແຂງ, ເປືອກແຕກເປັນເກັດ, ທຸກພາກສ່ວນຂອງລຳຕົ້ນມີຢາງ. ໃບດ່ຽວ, ອອກຮຽງສະຫຼັບເປັນວົງວຽນ, ຮູບຮີກ້ວາງ ຫຼື ຮູບໄຂ່, ກ້ວາງປະມານ 13 ຊມ, ຍາວ 14-36 ຊມ, ໂຄນໃບຮູບຫົວໃຈ, ຂອບເປັນຄື້ນ ຫຼື ແສກແຂ້ວ, ປາຍແຫຼມ ຫຼື ມົນ, ແຜ່ນໃບໜາຄ້າຍຄືໜັງ, ແຜ່ນໃບດ້ານເທິງສີຂຽວເຂັ້ມ, ຜິວກ້ຽງມັນ, ແຜ່ນໃບດ້ານລຸ່ມສີຂຽວອ່ອນ, ມີຂົນອ່ອນນຸ່ມກະຈາຍຢ່າງໜາແໜ້ນ. ກ້ານໃບກົມ, ຍາວ 3.5-10 ຊມ, ມີຫູໃບ. ຊໍ່ດອກອອກເປັນແຕກແໜງ, ຍາວ 5-15 ຊມ. ດອກຍ່ອຍອອກຮຽງກັນ, ມີ 5-7 ດອກ. ໃບປະດັບດອກຍາວປະມານ 2 ຊມ. ກາບດອກຍາວ 1.5-3 ມມ, ສີຂຽວ. ກີບດອກຮູບຫອກມີ 5 ກີບ, ຮູບຫອກ ຫຼື ຮູບຂອບຂະໜານ, ຍາວ 2.5-3 ຊມ, ສີສົມພູ, ດ້ານນອກມີຂົນຮູບດາວກະຈາຍຢູ່ທົ່ວ. ເກສອນເພດຜູ້ມີປະມານ 30 ອັນ, ກ້ານຊູຖົງລະອອງສັ້ນ, ຖົງລະອອງເກສອນຍາວ 4-5 ມມ. ເຕົ້າໄຂ່ຈັບລຸ່ມ. ໝາກມີກາບດອກຫໍໄວ້, ມີສັນດ້ານເທິງ, ພາກສ່ວນປາຍມີປິກຍາວ 2 ອັນ, ກ້ວາງ 2.5-4 ຊມ, ຍາວ 5-15 ຊມ ແລະ ປີກສັ້ນ 3 ອັນ, ຍາວ 1.5-2 ຊມ, ພັບງໍກັບ, ບົວອົມຂຽວ.