ອາຫານການກິນຂອງຄົນລາວ
ທຸກປະເທດ ແລະ ທ້ອງຖິ່ນເຂດແຄວ້ນລ້ວນແລ້ວແຕ່ມີອາຫານການກິນອັນຫຼາກຫຼາຍ ປຸງແຕ່ງດວ້ຍສ່ວນປະກອບທີ່ຫາໄດ້ປະຈຳຖິ່ນ ປະເທດລາວເຮົາກໍເຊັ່ນກັນມີອາຫານຫຼາກຫຼາຍປະເພດໃຫ້ຮັບປະທານທັງອາຫານຄາວ ແລະ ຫວານ. ເຂົ້າໜຽວ ຄືອາຫານຫຼັກຂອງຄົນລາວ ທີ່ຮັບປະທານກັນມາດົນນານນັບຕັ້ງແຕ່ປູ່ຍ່າຕາຍາຍ ມີຫຼາກຫຼາຍຊະນິດພັນເຊັ່ນ: ເຂົ້າກໍ່າ, ເຂົ້າແຜ່, ເຂົ້າໄກ່ນ້ອຍ (GI) ແລະ ອື່ນໆ. ເຂົ້າໜຽວໃນປະເທດລາວ ຖືໄດ້ວ່າເປັນເຂົ້າພິເສດຊະນິດພັນໜຶ່ງ ເນື່ອງຈາກໂດຍທົ່ວໄປແລ້ວເຮົາຈະນຳເມັດເຂົ້າມາຮັບປະທານກໍຕໍ່ເມື່ອເມັດເຂົ້ານັ້ນແກ່ເຫຼືອງ, ແຕ່ສຳລັບເຂົ້າໜຽວລາວເຮົາຄື ສາມາດຮັບປະທານເຂົ້າໄດ້ຫຼາຍຊ່ວງອາຍຸຂອງເຂົ້າເຊັ່ນ: ຊ່ວງເຂົ້າອ່ອນທີ່ຍັງເປັນສີຂຽວ ຮຽກວ່າ ເຂົ້າເໝົ້າ ແລະ ເຂົ້າທີ່ມີສີນໍ້າຕານຮຽກວ່າ ເຂົ້າຮາງ ເຊິ່ງນິຍົມນຳມາເຮັດເຂົ້າໜົມ ໂດຍປຸງແຕ່ງໃສ່ກະທິ ແລະ ນໍ້າຕານລາວ (ເຮັດມາຈາກອ້ອຍ ຫຼື ໝາກຕານ) ຈະຊ່ວຍໃຫ້ເຂົ້າໜົມມີລົດຊາດຫວານ ແລະ ມີກິ່ນຫອມ.
ນອກຈາກຊາວລາວຈະກິນເຂົ້າເປັນອາຫານຫຼັກແລ້ວ ກໍຍັງມີອາຫານອື່ນໆຊ່ວຍເພີ່ມໂພຊະນາການນຳອີກເຊັ່ນ: ຊີ້ນ, ປາ,ຜັກ, ໜໍ່ໄມ້, ເຫັດ ແລະ ອື່ນໆ. ປະເພດອາຫານທີ່ຄົນລາວນິຍົມປຸງແຕ່ງມີຫຼາກຫຼາຍປະເພດເຊັ່ນ: ຕົ້ມ, ແກງ, ປີ້ງ ຫຼື ເຜົາ, ໝົກ, ຂົ້ວຈືນ, ແຈ່ວ, ລາບກ້ອຍ, ເຄື່ອງດອງຕ່າງໆ ແລະ ຂອງຫວານເປັນຕົ້ນ. ໃນນັ້ນ, ລາບຄືອາຫານຈານພິເສດ ຂາດບໍ່ໄດ້ໃນງານລ້ຽງຕ່າງໆ ລາບສາມາດເຮັດໄດ້ຈາກຊີ້ນຫຼາກຫຼາຍປະເພດບໍ່ວ່າເປັນ ງົວ, ຄວາຍ, ໝູ, ເປັກ, ໄກ່ ແລະ ປາ.
ປະເທດລາວມີອາຫານທີ່ມີລົດຊາດແຊບເປັນເອກະລັກ ແລະ ນິຍົມຮັບປະທານຫຼາກຫຼາຍປະເພດ ໂດຍອີງຕາມລະດູການຂອງທຳມະຊາດ ເຊັ່ນ: ແກງໜໍ່ໄມ້ ຊ່ວງລະດູຝົນ, ເຂົ້າຫຼາມຫຼັງລະດູການເກັບກ່ຽວ ເປັນຕົ້ນ. ນອກນັ້ນຍັງມີອາຫານທີ່ນິຍົມຮັບປະທານໄດ້ທົ່ວໄປ ປຸງແຕ່ງຈາກສ່ວນປະສົມທຳມະຊາດ ມີປະໂຫຍດແກ່ສຸຂະພາບ ສາມາດເຂົ້າໄປສຶກສາເລື່ອງເລົ່າວິທີປຸງແຕ່ງອາຫານໄດ້ແລ້ວທີ່ www.phakhaolao.la
ຂໍ້ມູນ ຫານຊະນະ ສີສານ, ລາວ ດິນແດນແຫ່ງວັດທະນະທຳ